অসম চৰকাৰে জুবিন গাৰ্গৰ মৃত্যু গোচৰৰ বাবে এখন দ্ৰুত আদালত (fast-track court) স্থাপন কৰিবলৈ গুৱাহাটী উচ্চ ন্যায়ালয়ৰ কাষ চাপিব। ১২ ডিচেম্বৰত একাধিক অভিযুক্তৰ বিৰুদ্ধে বিস্তৃত চাৰ্জশ্বীট দাখিল কৰাৰ পিছত মুখ্যমন্ত্ৰী ড০ হিমন্ত বিশ্ব শৰ্মাই এই কথা ঘোষণা কৰে।
সাংবাদিকৰ সৈতে হোৱা কথাবাৰ্তাত মুখ্যমন্ত্ৰী শৰ্মাই নিশ্চিত কৰি কয় যে ৰাজ্য চৰকাৰে গুৱাহাটী উচ্চ ন্যায়ালয়ৰ মুখ্য ন্যায়াধীশৰ ওচৰত দ্ৰুত আদালতৰ বাবে আবেদন কৰিব আৰু এবাৰ গোচৰটো ছেছনছ আদালতত দাখিল হোৱাৰ পিছত এজন বিশেষ ৰাজহুৱা অধিবক্তা নিযুক্তি দিব। তেওঁ কয়, “এতিয়া আমি এই পদক্ষেপসমূহকে সাৱধানে ল’ব লাগিব।”
উল্লেখ্য যে মুখ্য ন্যায়িক দণ্ডাধীশৰ আদালতত দাখিল কৰা এই চাৰ্জশ্বীটখন প্ৰায় ১২,০০০ পৃষ্ঠাৰ নথি-পত্ৰৰে সমৃদ্ধ।
চাৰ্জশ্বীটত কেবাজনো লোকৰ বিৰুদ্ধে ভাৰতীয় ন্যায় সংহিতাৰ ধাৰা ১০৩ ৰ অধীনত হত্যাৰ অভিযোগ সন্নিৱিষ্ট কৰা হৈছে। জুবিন গাৰ্গৰ দুজন ব্যক্তিগত নিৰাপত্তাৰক্ষীৰ বিৰুদ্ধেও পৃথক অভিযোগ অনা হৈছে।
মুখ্যমন্ত্ৰী শৰ্মাই কয় যে যদিও ছিংগাপুৰৰ পৰাও নথি-পত্ৰ সংগ্ৰহ কৰা হৈছিল। মূলতঃ অসমৰ ভিতৰতে সংগ্ৰহ কৰা সাক্ষ্যৰ ওপৰত ভিত্তি কৰি গোচৰটো শক্তিশালী কৰি তোলা হৈছে। তেওঁ কয়, “যদি আদালতে কয় যে ছিংগাপুৰৰ নথি-পত্ৰ গ্ৰহণযোগ্য নহয়, তেন্তে আমি এনেদৰে এখন চাৰ্জশ্বীট দাখিল কৰিছোঁ যে অসমতে সংগ্ৰহ কৰা নথিসমূহেই অভিযোগ প্ৰমাণ কৰিবলৈ যথেষ্ট।”
মুখ্যমন্ত্ৰীয়ে ন্যায়িক প্ৰক্ৰিয়াৰ ওপৰত আস্থা প্ৰকাশ কৰি কয়, “আমাৰ ন্যায়পালিকাৰ প্ৰতি আমাৰ সম্পূৰ্ণ সন্মান আছে। আমি তেওঁলোকৰ স্বাধীনতাৰ বিষয়ে জানো। আমি তেওঁলোকৰ নিৰপেক্ষতাৰ বিষয়ে জানো আৰু আমি জানো যে কেনেকৈ ন্যায়পালিকাই সদায় এজন ভুক্তভোগীক ন্যায় বিচাৰ প্ৰদান কৰে।” তেওঁ লগতে কয় যে চৰকাৰে এতিয়া আদালতৰ কাৰ্য্যক্ৰমৰ বাবে অপেক্ষা কৰিছে।