বাৰাণসীত স্পা চেণ্টাৰৰ আঁৰত চলি থকা ৰমৰমীয়া দেহ ব্যৱসায়ৰ এক চাঞ্চল্যকৰ তথ্য ফাদিল হৈছে, যাৰ সূত্ৰ ধৰি কিছুমান ভদ্ৰ পোছাক পৰিহিত ব্যক্তিৰ নামো পোহৰলৈ আহিছে।
চহৰখনত এক বৃহৎ অভিযান চলাই বাৰাণসী আৰক্ষীৰ এছঅ’জি ২ টীমে চিগ্ৰা থানা এলেকাৰ দুটা স্থানত অভিযান চলায়। স্মাৰ্ট বজাৰৰ ওচৰৰ এবি মেৰিজ লনৰ বিপৰীতে থকা মেল’ডি স্পা আৰু ত্ৰিনেত্ৰ ভৱনৰ কাষৰ কানহাইয়া লাল শৰাফ ভৱনৰ ১১২ নম্বৰ ফ্লেটত এই দেহ ব্যৱসায় চলি আছিল বুলি আৰক্ষীয়ে সদৰী কৰিছে।
অভিযানৰ সময়ত দুয়োটা স্থানৰ পৰা মুঠ ১৩ জনক গ্ৰেপ্তাৰ কৰা হয়, যাৰ ভিতৰত ৯গৰাকী মহিলা।
তদন্তত পোহৰলৈ আহিছে যে দুয়োটা স্থানৰ গৰাকী হৈছে বিজেপি নেত্ৰী শালিনী যাদৱৰ স্বামী অৰুণ যাদৱ। শালিনী যাদৱে পূৰ্বে কংগ্ৰেছৰ টিকটত বাৰাণসীৰ মেয়ৰ পদৰ বাবে আৰু পিছত সমাজবাদী পাৰ্টিৰ প্ৰাৰ্থী হিচাপে লোকসভা নিৰ্বাচনত প্ৰতিদ্বন্দ্বিতা কৰিছিল।
আৰক্ষীয়ে একেসময়তে দুয়োটা স্থানত অভিযান চলাইছিল—মেল’ডি স্পা আৰু ১১২ নম্বৰ ফ্লেটত। মেল’ডি স্পাৰ পৰা চাৰিগৰাকী মহিলা আৰু চাৰিজন পুৰুষক সন্দেহজনক অৱস্থাত আটক কৰা হয়। তাত ২৩,১০০ টকা নগদ, মোবাইল, ডায়েৰীসহ কেইবাটাও অপৰাধ সংক্ৰান্ত সামগ্ৰী উদ্ধাৰ কৰা হয়।
১১২ নম্বৰ ফ্লেটৰ পৰাও পাঁচগৰাকী মহিলাক আপত্তিজনক অৱস্থাত পোৱা যায়। এই স্থানৰ পৰাও একাধিক প্ৰমাণ স্বৰূপ সামগ্ৰী উদ্ধাৰ কৰা হৈছে। অভিযানৰ পিছত স্থান দুটা আৰক্ষীয়ে ছীল কৰি দিয়ে।
প্ৰাথমিক তদন্তৰ পিছত চিগ্ৰা থানাত অভিযুক্তসকলৰ বিৰুদ্ধে একাধিক ধাৰাত গোচৰ ৰুজু কৰা হৈছে। অভিযুক্তসকলৰ বিৰুদ্ধে আদালতত কঠোৰ ব্যৱস্থা ল’ব পৰাকৈ আৰক্ষীয়ে চিচিটিভি ফুটেজ, মোবাইল ডেটা আৰু ফৰেনচিক প্ৰমাণ সংগ্ৰহ কৰিছে।
তদন্তত নিশ্চিত কৰা হৈছে যে অভিযান চলোৱা দুয়োটা স্থানই বিজেপি নেত্ৰী শালিনী যাদৱৰ স্বামী অৰুণ যাদৱৰ নামত আছে। শালিনী যাদৱে ২০১৭ চনত কংগ্ৰেছৰ প্ৰাৰ্থী হিচাপে বাৰাণসী মেয়ৰ নিৰ্বাচনত দ্বিতীয় স্থান লাভ কৰিছিল। পিছত ২০১৯ চনত সমাজবাদী পাৰ্টিৰ টিকটত লোকসভা নিৰ্বাচনত প্ৰতিদ্বন্দ্বিতা কৰে। ২০২৩ চনৰ ২৪ জুলাইত তেওঁ সমাজবাদী পাৰ্টি এৰি বিজেপিত যোগদান কৰে।