২০২৬ চনৰ বিধানসভা নিৰ্বাচনক লৈ ৰাজ্যৰ নিৰ্বাচনী কুৰুক্ষেত্ৰ এতিয়াৰ পৰাই উত্তপ্ত হৈ পৰিছে। এই নিৰ্বাচনত কোনো কাৰণতে এ আই ইউ ডি এফৰ সৈতে কংগ্ৰেছ দলে মিত্ৰতা নকৰে বুলি সোমবাৰে পুনৰবাৰ স্পষ্ট কৰি দিয়ে সাংসদ তথা বিৰোধী দলপতি গৌৰৱ গগৈয়ে।
বদৰুদ্দিন আজমলৰ নেতৃত্বাধীন দলটোক বিজেপিৰ দৰেই এক ‘সাম্প্ৰদায়িক শক্তি’ বুলি অভিহিত কৰি গগৈয়ে কয় যে এটা সাম্প্ৰদায়িকতাক পৰাস্ত কৰিবলৈ আন এটা সাম্প্ৰদায়িক শক্তিৰ সহায় লোৱাৰ প্ৰশ্নই নুঠে।
২০২৬ৰ নিৰ্বাচনত গেৰুৱা বাহিনীক প্ৰত্যাহ্বান জনাবলৈ ইতিমধ্যে আঠটা বিৰোধী দল একত্ৰিত হৈছে। এই তালিকাত কংগ্ৰেছৰ লগতে আছে চিপিআই(এম), ৰাইজৰ দল, অসম জাতীয় পৰিষদ (এজেপি), চিপিআই, চিপিআই(এমএল), জাতীয় দল-অসম আৰু কাৰ্বি আংলঙৰ এপিএইচএলচি। এই দলসমূহৰ সৈতে মিত্ৰতাৰ সন্দৰ্ভত গগৈয়ে কয়, “আমি অতি সাৱধানে মিত্ৰতাৰ আলোচনা আগবঢ়াই নিছোঁ। এনে বিষয়বোৰ ৰাজহুৱা স্থানতকৈ কেমেৰাৰ আঁৰত আলোচনা কৰাটোহে বেছি ফলপ্ৰসূ। সময়ত সকলো আনুষ্ঠানিকভাৱে ঘোষণা কৰা হ’ব।” তেওঁ লগতে দাবী কৰে যে আগন্তুক নিৰ্বাচন শাসকীয় বিজেপিৰ বাবে কোনোমতে সহজ নহ’ব।
মুখ্যমন্ত্ৰী হিমন্ত বিশ্ব শৰ্মাক আক্ৰমণৰ লক্ষ্য কৰি লৈ বিৰোধী দলপতিগৰাকীয়ে অভিযোগ কৰে যে বিজেপি দলটো এতিয়া কেৱল এজন ব্যক্তি আৰু তেওঁৰ দুই-এজন ঘনিষ্ঠ সহযোগীৰ পকেটত সোমাই পৰিছে। তেওঁ কয়, “বিজেপিৰ মন্ত্ৰী আৰু কেইজনমান বিশেষ মানুহৰহে উন্নয়ন হৈছে, কিন্তু দলটোৰ তৃণমূল কৰ্মীসকলে একো লাভ কৰা নাই। বিজেপি কৰ্মীসকলেও এতিয়া অনুভৱ কৰিছে যে বৰ্তমানৰ নেতৃত্বৰ অধীনত দলটোৰ ভৱিষ্যত সুৰক্ষিত নহয়।”
কংগ্ৰেছক ‘মিঞা সমৰ্থক’ বুলি বিজেপিয়ে কৰি অহা অভিযোগক ৰাজনৈতিক উদ্দেশ্যপ্ৰণোদিত আৰু হাস্যকৰ বুলি কয় গৌৰৱ গগৈয়ে। তেওঁ যুক্তি দৰ্শায় যে যোৱা এপ্ৰিল মাহৰ পৰা যিসকল লোকে কংগ্ৰেছত যোগদান কৰিছে, তেওঁলোকৰ পৰিচয় চালেই গম পোৱা যায় যে অসমৰ জলবায়ু আৰু মাটিক ভালপোৱা খাতিখোৱা মানুহহে কংগ্ৰেছৰ কাষ চাপিছে।
উল্লেখ্য যে, ২০২১ চনৰ নিৰ্বাচনত কংগ্ৰেছ আৰু এ আই ইউ ডি এফৰ মিত্ৰতা আছিল যদিও ভূপেন কুমাৰ বৰাই প্ৰদেশ কংগ্ৰেছৰ দায়িত্ব লোৱাৰ পাছতেই এই মিত্ৰতা ভংগ হয়। গৌৰৱ গগৈৰ শেহতীয়া এই ঘোষণাৰ পিছত এ আই ইউ ডি এফৰ ৰাজনৈতিক ভৱিষ্যত তথা বিৰোধী ঐক্যৰ নতুন সমীকৰণে বিশেষ তাৎপৰ্য বহন কৰিছে।