প্ৰধানমন্ত্ৰী নৰেন্দ্ৰ মোদীয়ে বিশ্বৰ মঞ্চত ভাৰতৰ বৰ্ধিত গুৰুত্ব প্ৰদৰ্শন কৰি সোমবাৰে তিনিখন মহাদেশৰ তিনিখন দেশ ভ্ৰমণৰ বাবে দিল্লীৰ পৰা যাত্ৰা আৰম্ভ কৰিছে। এই ভ্ৰমণসূচীত আছে জৰ্ডান, ইথিওপিয়া ফেডাৰেল ডেম’ক্ৰেটিক ৰিপাব্লিক আৰু ওমান।
প্ৰধানমন্ত্ৰী মোদীৰ প্ৰথম গন্তব্যস্থান হৈছে জৰ্ডান। জৰ্ডানৰ ৰজা দ্বিতীয় আব্দুল্লাহ ইবনে আল হুছেইনৰ আমন্ত্ৰণত তেওঁ এই ভ্ৰমণ কৰিব। এই ভ্ৰমণ এই কাৰণে তাৎপৰ্যপূৰ্ণ যে এই বছৰ ভাৰত-জৰ্ডানৰ কূটনৈতিক সম্পৰ্কৰ ৭৫ বছৰ সম্পূৰ্ণ হৈছে। দুয়োখন দেশৰ মাজত শান্তি, নিৰাপত্তা আৰু আঞ্চলিক স্থিতিশীলতাৰ ওপৰত আলোচনা হোৱাৰ সম্ভাৱনা আছে।
ভ্ৰমণৰ পূৰ্বে প্ৰধানমন্ত্ৰীয়ে কয়, “মই জৰ্ডান, ইথিওপিয়া ফেডাৰেল ডেম‘ক্ৰেটিক ৰিপাব্লিক আৰু ওমানলৈ তিনিখন দেশৰ ভ্ৰমণলৈ ওলাইছো। এই তিনিখন দেশৰ সৈতে ভাৰতৰ অতি প্ৰাচীন সভ্যতাৰ সম্পৰ্ক আছে। ইয়াৰ উপৰিও সমসাময়িক দ্বিপাক্ষিক সম্পৰ্ক ব্যাপক আছে।”
জৰ্ডান ভ্ৰমণৰ অন্তত মোদীয়ে ১৬ ডিচেম্বৰত আফ্ৰিকাৰ দেশ ইথিওপিয়াত উপস্থিত হ’ব। এইটোৱেই প্ৰধানমন্ত্ৰী হিচাপে তেওঁৰ প্ৰথম ইথিওপিয়া ভ্ৰমণ। ‘গ্ল’বেল চাউথ‘ৰ অংশীদাৰ হিচাপে দুয়োখন দেশে পাৰস্পৰিক সহযোগিতাৰ বাবে ইতিমধ্যে কেইবাটাও প্ৰতিশ্ৰুতি দিছে। নৰেন্দ্ৰ মোদীয়ে ইথিওপিয়াৰ প্ৰধানমন্ত্ৰী আবি আহমেদ আলীৰ সৈতে এক গুৰুত্বপূৰ্ণ বৈঠকত মিলিত হৈ দ্বিপাক্ষিক বন্ধুত্ব আৰু সম্পৰ্ক অধিক সম্প্ৰসাৰণৰ লক্ষ্য লৈছে।
ইথিওপিয়া ভ্ৰমণ সন্দৰ্ভত তেওঁ কয়, “মই মোৰ প্ৰথম ভ্ৰমণত ফেডাৰেল ডেম‘ক্ৰেটিক ৰিপাব্লিক অৱ ইথিওপিয়া ভ্ৰমণ কৰিম। আদিছ আবাবাও আফ্ৰিকান ইউনিয়নৰ মুখ্য কাৰ্যালয়। ২০২৩ চনত ভাৰতৰ জি-২০ সভাপতিত্বৰ সময়ত আফ্ৰিকান ইউনিয়নক জি-২০ৰ স্থায়ী সদস্য হিচাপে স্বীকৃতি দিয়া হ‘ব। আদিছ আবাবাত মই ড° আবি আহমেদ আলীৰ সৈতে বিতং আলোচনা কৰিম আৰু তাত বাস কৰা ভাৰতীয় প্ৰব্ৰজনকাৰীসকলক লগ পোৱাৰ সুযোগ পাম।”
অৱশেষত ১৭ ডিচেম্বৰত প্ৰধানমন্ত্ৰী আৰবৰ ওমান ভ্ৰমণ কৰিব। ‘চুলতান‘ হাইথাম বিন তাৰিকৰ আমন্ত্ৰণত এয়া তেওঁৰ দ্বিতীয়বাৰৰ বাবে ওমান ভ্ৰমণ। এই বছৰ ভাৰত-ওমান সম্পৰ্কৰ ৭০ বছৰ সম্পূৰ্ণ হৈছে। দীৰ্ঘদিন ধৰি দুয়োখন দেশ বাণিজ্য আৰু সাংস্কৃতিক সম্পৰ্কৰ সৈতে ঘনিষ্ঠভাৱে জড়িত। প্ৰধানমন্ত্ৰী মোদী আৰু ওমানৰ চুলতানে শক্তি, কৃষি, প্ৰতিৰক্ষা, প্ৰযুক্তিকে ধৰি কেইবাটাও ক্ষেত্ৰত পাৰস্পৰিক সহযোগিতাৰ বিষয়ে আলোচনা কৰাৰ সম্ভাৱনা আছে।
ওমান ভ্ৰমণৰ সন্দৰ্ভত তেওঁ কয়, “মাস্কাত মই ওমানৰ চুলতানৰ সৈতে আলোচনা কৰিম। আমাৰ কৌশলগত অংশীদাৰিত্বৰ লগতে আমাৰ শক্তিশালী বাণিজ্য আৰু অৰ্থনৈতিক সম্পৰ্কক আৰু অধিক শক্তিশালী কৰাৰ প্ৰচেষ্টা চলোৱা হ‘ব। মই ওমানত প্ৰৱাসী ভাৰতীয়সকলৰ এক সমাৱেশক ভাষণ দিম।”
তিনিওখন দেশ ভ্ৰমণ কৰি ১৮ তাৰিখে মোদী ঘৰলৈ উভতি আহিব। ২০১৪ চনত দেশৰ প্ৰধানমন্ত্ৰী হোৱাৰ পিছৰে পৰা নৰেন্দ্ৰ মোদীয়ে সময়ে সময়ে বিদেশ ভ্ৰমণ কৰি সমগ্ৰ বিশ্বৰ সৈতে কূটনৈতিক সম্পৰ্ক সুদৃঢ় কৰি আহিছে। বছৰটোৰ শেষৰ ফালে তিনিখন মহাদেশৰ তিনিখন দেশ ভ্ৰমণে বিশ্বৰ ৰাজনীতিত ভাৰতৰ এক শক্তিশালী স্থানৰ ইংগিত দিছে।