ভাৰতত চলি থকা গট কনচাৰ্টৰ অংশ হিচাপে ফুটবলাৰ লিয়নেল মেছি মুম্বাই, কলকাতা আৰু হায়দৰাবাদৰ মাজেৰে আহি এতিয়া ৰাজধানী দিল্লীত উপস্থিত হৈছে। দিল্লীৰ অৰুণ জেটলী ষ্টেডিয়ামত এই বৃহৎ অনুষ্ঠানৰ সামৰণি পৰিব। কিন্তু, দিল্লীৰ অতিমাত্ৰা বায়ু প্ৰদূষণৰ বাবে মেছিৰ অনুৰাগীসকলে তেওঁৰ স্বাস্থ্যক লৈ গভীৰ উদ্বেগ প্ৰকাশ কৰিছে।
সোমবাৰৰ দিল্লীৰ বতৰৰ পৰিসংখ্যাই এক উদ্বেগজনক ছবি দাঙি ধৰিছে। বাতৰি অনুসৰি, ৰাজধানীৰ বতাহত উশাহ লোৱাটো দিনটোত ২৭টা চিগাৰেট খোৱাৰ সমতুল্য! ইয়াৰ অৰ্থ হ’ল মেছিয়ে মাত্ৰ ১০ ঘণ্টা সময় দিল্লীত অতিবাহিত কৰিলে ২৭টা চিগাৰেট খোৱাৰ সমপৰিমাণৰ ক্ষতি তেওঁৰ হাওঁফাওঁত হ’ব পাৰে।
সোমবাৰে দিনৰ ২ বজাৰ ভিতৰত লিয়নেল মেছি ৰাজধানী চহৰত ভৰি থ’ব। তেওঁ অৰুণ জেটলী ষ্টেডিয়ামত অনুষ্ঠিত হ’বলগীয়া ধাৰাবাহিক অনুষ্ঠানত অংশগ্ৰহণ কৰিব, য’ত ভাৰতীয় ক্ৰিকেট তাৰকা বিৰাট কোহলীও উপস্থিত থকাৰ সম্ভাৱনা আছে।
ইফালে, সোমবাৰে পুৱা দিল্লী আৰু ইয়াৰ কাষৰীয়া অঞ্চলসমূহ ঘন ধোঁৱা আৰু কুঁৱলীৰে আৱৰি আছিল। জাহাংগীৰপুৰাৰ বায়ুৰ মানদণ্ড সূচক (AQI) ৪৯৮ লৈ বৃদ্ধি পাইছিল, যিটো ‘বিপজ্জনক’ বা ‘চৰম’ (Critical) স্তৰৰ ওচৰা-ওচৰি। দেওবাৰৰ তুলনাত সোমবাৰে দিল্লীৰ প্ৰদূষণৰ মাত্ৰা যথেষ্ট বৃদ্ধি পাইছে। বিশ্লেষকসকলৰ মতে, দিল্লীৰ ৪৯৪ AQI মানে দিল্লীবাসীয়ে দিনটোত গড়ে ২৭টা চিগাৰেট সেৱন কৰি আছে।
এই ভয়াৱহ বায়ু প্ৰদূষণৰ মাজতে মেছিৰ দিল্লী আগমনৰ খবৰে ছচিয়েল মিডিয়াত অসংখ্য মিম আৰু আলোচনাৰ জন্ম দিছে। এজন অনুৰাগীয়ে উদ্বেগ প্ৰকাশ কৰি লিখিছে, “শুনিছো যে মেছিৰ ভৰিৰ বীমা ৯০ কোটি ডলাৰৰ। কিন্তু তেওঁৰ হাওঁফাওঁৰ বীমা আছেনে?” আন এজনে ঠাট্টা কৰি কৈছে যে মেছিৰ কেৰিয়াৰত ৮৯৬টা গ’ল আছে, কিন্তু দিল্লীৰ প্ৰদূষণৰ মাত্ৰা হয়তো তাতোকৈও অধিক হ’ব পাৰে।
দিল্লীৰ লোকসকলে মেছি আৰু বিৰাট কোহলীৰ যৌথ উপস্থিতিৰ বাবে আগ্ৰহেৰে অপেক্ষা কৰি আছে, কিন্তু ঘন ধোঁৱাৰ বাবে দুয়োকে স্পষ্টকৈ দেখা পোৱা যাবনে নাই সেয়াও এক প্ৰশ্ন হৈ পৰিছে।
মন কৰিবলগীয়া যে দীপাৱলীৰ পৰা দিল্লীৰ বায়ু বিষাক্ত হৈ আহিছে। যাৰ ফলত দিল্লী চৰকাৰে পৰিস্থিতি নিয়ন্ত্ৰণ কৰিবলৈ ‘ক্লাউড ছিডিং’ৰ ব্যৱস্থা কৰিছিল। কিন্তু তিনিবাৰৰ বিফল পৰীক্ষাত ইতিমধ্যে প্ৰায় ১.০৭ কোটি টকা ব্যয় কৰা হৈছে, অথচ কোনো লাভ হোৱা নাই। বৰঞ্চ প্ৰদূষণৰ মাত্ৰা বাঢ়িছেহে। বিশেষজ্ঞসকলে সতৰ্ক কৰি দিছে যে এই প্ৰদূষণ শিশু আৰু বৃদ্ধ লোকসকলৰ বাবে অত্যন্ত বিপদজনক। এনে পৰিস্থিতিত আন্তঃৰাষ্ট্ৰীয় ফুটবলাৰগৰাকীৰ দিল্লী ভ্ৰমণক লৈ সকলোৱে গভীৰ উদ্বেগ প্ৰকাশ কৰিছে।