গুৱাহাটীস্থিত উত্তৰ পূৱ ভাৰতৰ অন্যতম দ্বি-ভাষিক স্বতন্ত্ৰ সংবাদ প্ৰতিষ্ঠান নৰ্থইষ্ট নাও-এ অহা ১৫ ডিচেম্বৰত অষ্টম বৰ্ষত ভৰি দিব। ২০১৭ চনৰ ১৫ ডিচেম্বৰত প্ৰতিষ্ঠা লাভ কৰা নৰ্থইষ্ট নাও-এ যোৱা সাতটা বছৰে ইংৰাজী আৰু অসমীয়া ভাষাত নিৰ্ভীক, তথ্যপূৰ্ণ বাতৰি পৰিৱেশন কৰি নিজস্ব পৰিচয় গঢ়ি তুলিছে।
বিগত সাতটা বৰ্ষত স্বতন্ত্ৰ সংবাদ মাধ্যম হিচাপে বহু প্ৰত্যাহ্বানৰ সন্মুখীন হৈ আহিছে নৰ্থইষ্ট নাও-এ। প্ৰত্যাহ্বান নেওচি অষ্টম বৰ্ষত ভৰি দিয়া নৰ্থইষ্ট নাও-এ অষ্টম বৰ্ষপূৰ্তি উলপলক্ষ্যে দিছপুৰস্থিত শ্ৰীমন্ত শংকৰ একাডমিৰ প্ৰেক্ষাগৃহত ‘সংকটত নেকি আমাৰ গণতন্ত্ৰ’ শীৰ্ষক এক বক্তৃতানুষ্ঠানৰ আয়োজন কৰিছে।
সোমবাৰে (১৫ ডিচেম্বৰ) বিয়লি ৪ বজাৰ পৰা আৰম্ভ হ’বলগীয়া উক্ত বক্তৃতানুষ্ঠানত বক্তৃতা প্ৰদান কৰিব দেশৰ বিশিষ্ট অৰ্থনীতিবিদ, ৰাজনৈতিক বিশ্লেষক, লেখক পৰকলা প্ৰভাকৰে। বক্তৃতাৰ পিছৰ প্ৰশ্নোত্তৰ শিতানত উপস্থিত দৰ্শকে তেওঁক বক্তৃতাৰ সংক্ৰান্তীয় প্ৰশ্ন কৰিব পাৰিব।
‘দ্য ক্ৰুকড টিম্বাৰ অৱ নিউ ইণ্ডিয়া– এছে অন এ ৰিপাব্লিক ইন ক্ৰাইচিছ’ নামৰ বহু চৰ্চিত গ্ৰন্থখনৰ লেখক পৰকলা প্ৰভাকৰ দিল্লীৰ জৱাহৰলাল নেহৰু বিশ্ববিদ্যালয়ত অৰ্থনীতি বিষয়ত উচ্চ শিক্ষা গ্ৰহণ কৰি বিশ্বৰ প্ৰসিদ্ধ শিক্ষানুষ্ঠান লণ্ডন স্কুল অৱ ইক’নমিক্সৰ পৰা অৰ্থনীতিত ডক্টৰেট ডিগ্ৰী লাভ কৰে।
তেওঁ অন্ধ্ৰ প্ৰদেশ চৰকাৰৰ যোগাযোগ উপদেষ্টা হিচাপে কেবিনেট মৰ্যাদাৰে কাৰ্যনিৰ্বাহ কৰিছিল। প্ৰভাকৰে প্ৰধানমন্ত্ৰী নৰেন্দ্ৰ মোদীৰ বিজেপি চৰকাৰৰ ৰাজনৈতিক আৰু অৰ্থনৈতিক নীতিসমূহৰ ভুল ত্ৰুটিবোৰ তথ্যপাতিৰে ফঁহিয়াই বিৰোধ কৰি আহিছে।
বিশিষ্ট অৰ্থনীতিবিদ, ৰাজনৈতিক বিশ্লেষক পৰকলা প্ৰভাকৰৰ বক্তৃতানুষ্ঠানত আগ্ৰহীসকলক উপস্থিত থাকিবলৈ সংবাদ প্ৰতিষ্ঠানটোৱে এই বিবৃতিযোগে নিমন্ত্ৰণ জনাইছে।