জম্মু-কাশ্মীৰৰ পৰা সন্ত্ৰাসবাদৰ শিপা উভালি পেলাবলৈ নিৰাপত্তা বাহিনীয়ে এক বৃহৎ পদক্ষেপ গ্ৰহণ কৰিছে। তিনি দশক পুৰণি এটা গোচৰত মঙলবাৰে উপত্যকাটোৰ বিচ্ছিন্নতাবাদী নেতা জাভেদ মিৰক গ্ৰেপ্তাৰ কৰা হয়।
১৯৯৬ চনত শ্ৰীনগৰত সংঘটিত ভয়াৱহ হিংসাত্মক ঘটনাৰ অভিযুক্ত আছিল জাভেদ মিৰ। জানিব পৰা মতে, এই জাভেদ মিৰ কাশ্মীৰত সন্ত্ৰাসবাদী কাৰ্যকলাপৰ অন্যতম পাণ্ডা য়াছিন মালিকৰ ঘনিষ্ঠ সহযোগী।
আৰক্ষী সূত্ৰই জনোৱা মতে, ১৯৯৬ চনত কাশ্মীৰৰ বিচ্ছিন্নতাবাদী সংগঠনৰ এজন মৃত কামাণ্ডাৰৰ মৃতদেহ লৈ জাভেদ আৰু তেওঁৰ সহযোগীসকলে শ্ৰীনগৰত শোভাযাত্ৰা কৰিছিল। শ্ৰীনগৰৰ নাজ ক্ৰছিং এলেকাত সেই শোভাযাত্ৰাৰ পৰাই উত্তেজিত জনতাই আৰক্ষীৰ ওপৰত আক্ৰমণ চলাইছিল। জাভেদৰ নেতৃত্বতে এই আক্ৰমণ সংঘটিত হৈছিল। এই ঘটনাত বহু আৰক্ষী আহত হৈছিল। সেই পুৰণি গোচৰটোতে আৰক্ষীয়ে জাভেদৰ বিৰুদ্ধে এজাহাৰ দাখিল কৰিছিল আৰু সেই গোচৰৰ ভিত্তিত তেওঁক গ্ৰেপ্তাৰ কৰা হৈছে।
আৰক্ষীৰ দাবী অনুসৰি, ৯০ৰ দশকত জম্মু-কাশ্মীৰত সন্ত্ৰাসৰ সৃষ্টি কৰা জাভেদ জম্মু-কাশ্মীৰ লিবাৰেচন ফ্ৰণ্ট (JKLF)-ৰ অন্যতম শীৰ্ষ কমাণ্ডাৰ আছিল। তেওঁ সমগ্ৰ কাশ্মীৰত একাধিক সন্ত্ৰাসবাদী কাৰ্যকলাপত প্ৰত্যক্ষভাৱে জড়িত আছিল।
এই JKLFৰ মুৰব্বী য়াছিন মালিকৰ তেওঁ আছিল মুখ্য সহযোগী। উল্লেখ্য যে, ১৯৯০ চনত বায়ুসেনাৰ চাৰিজনকৈ কৰ্মচাৰীক হত্যা কৰাৰ অভিযোগত অভিযুক্ত য়াছিন মালিক বৰ্তমান গ্ৰেপ্তাৰ হৈ আছে। ২০১৯ চনত পুলৱামাৰ সন্ত্ৰাসবাদী আক্ৰমণৰ পিছত চৰকাৰে JKLFক নিষিদ্ধ ঘোষণা কৰিছিল।
উল্লেখযোগ্য যে, যোৱা সোমবাৰে একেটা গোচৰতে শ্ৰীনগৰ আৰক্ষীয়ে আন এজন বিচ্ছিন্নতাবাদী নেতা চাকিল আহমেদ বকছিকো গ্ৰেপ্তাৰ কৰিছিল। JKLF সংগঠনে অস্ত্ৰ ত্যাগ কৰাৰ পিছতো মিৰ কাশ্মীৰৰ বিচ্ছিন্নতাবাদী ৰাজনীতিত সক্ৰিয় হৈ আছিল। ২০১৯ চনত ৩৭০ ধাৰা বাতিল কৰাৰ পিছৰে পৰা তেওঁ ইমান দিনে আত্মগোপন কৰি আছিল।