দক্ষিণ আফ্ৰিকাৰ বিৰুদ্ধে টেষ্ট শৃংখলাত পৰাজয়ৰ পিছত ভাৰতীয় ক্ৰিকেটত হতাশাৰ সৃষ্টি হৈছিল। গৌতম গম্ভীৰ অধীনত দলত ইটোৰ পিছত সিটো পৰিৱৰ্তনক সমালোচনা কৰা হৈছিল। সেই ছবিখন সলনি হ’ল এদিনীয়া শৃংখলাত। টিম ইণ্ডিয়াই ২-১ ব্যৱধানত জয়লাভ কৰে। এইবাৰ টি-২০ শৃংখলাতো সেই ধাৰা অব্যাহত থাকিল। আহমেদাবাদত অনুষ্ঠিত পঞ্চমখন টি-২০ মেচত টিম ইণ্ডিয়াই ৩০ ৰানত জয়লাভ কৰি ৩-১ ব্যৱধানত শৃংখলাত জয়লাভ কৰে। টি-২০ বিশ্বকাপৰ পূৰ্বে সূৰ্যকুমাৰৰ ড্ৰেছ ৰিহাৰ্চেল সফল হ’ল।
এই মেচতো ভাৰতে টছত পৰাস্ত হয়। দক্ষিণ আফ্ৰিকাৰ অধিনায়ক আইডেন মাৰ্কৰামে টছত জয়লাভ কৰি ফিল্ডিং কৰাৰ সিদ্ধান্ত লয়। আহমেদাবাদৰ খেলপথাৰত ৰান অনুসৰণ কৰিবলৈ বিচাৰিছিল। কিন্তু তেওঁলোকে তেনেকুৱা কৰাত ব্যৰ্থ হ’ল।
প্ৰথমে বেটিং কৰি ভাৰতে নিৰ্ধাৰিত ২০ অভাৰত ৫টা উইকেট হেৰুৱাই ২৩১ ৰান সংগ্ৰহ কৰে। এই মেচত সঞ্জু চেমছনে সুযোগ পাইছিল। শুভমন গিলৰ আঘাতৰ বাবে সুযোগ পাইছিল সঞ্জুৱে। আৰু সেই সুযোগৰ তেওঁ ব্যৱহাৰ কৰিলে। তেওঁ অ’পেন কৰি ২২টা বলত ৩৭ ৰান সংগ্ৰহ কৰে।
অভিষেক শৰ্মাই ধুমুহা আৰম্ভ কৰিছিল যদিও অৰ্ধশতক অৰ্জন কৰিব নোৱাৰিলে। তেওঁ ২১টা বলত ৩৪ ৰান সংগ্ৰহ কৰে। ইয়াৰ পিছত প্ৰত্যাশিত ধুমুহা আহিল। তিলক ভাৰ্মা আৰু হাৰ্দিক পাণ্ডিয়াই দলটোৰ স্থিতি মজবুত কৰে। হাৰ্দিক পাণ্ডিয়াই ১৬টা বলতে অৰ্ধশতক অৰ্জন কৰে। ইটোৰ পিছত সিটো ডাঙৰ ডাঙৰ শ্বট মাৰি থাকিল। তেওঁ ২৫টা বলত ৬৩ ৰানৰ ইনিংছ খেলে।
হাৰ্দিকৰ সৈতে অৰ্ধশতক অৰ্জন কৰে তিলক ভাৰ্মাই। তেওঁ ৪২টা বলত ৭৩ ৰান সংগ্ৰহ কৰে। তিলক আৰু হাৰ্দিকে ১০৫ ৰানৰ পাৰ্টনাৰশ্বিপ গঢ়ে। ৪৪ বলত এই ৰান সংগ্ৰহ কৰে। কিন্তু হাৰ্দিক আৰু তিলকৰ এই ইনিংছ নহ’লে ভাৰতৰ সমস্যা বাঢ়িলহেতেন। এই মেচতো তিনি নম্বৰত নামি ব্যৰ্থ হয় সূৰ্যকুমাৰ যাদৱ। তেওঁ ৭টা বলত ৫ ৰান কৰি আউট হয়।
দক্ষিণ আফ্ৰিকাৰ হৈ কোনেও বলিঙত বিশেষ প্ৰভাৱ দেখুৱাব নোৱাৰিলে। কৰ্বিন বছে দুটা উইকেট দখল কৰে। বাৰ্টমেন আৰু জৰ্জ লিণ্ডে এটাকৈ উইকেট লয়।
২৩১ ৰান অনুসৰণ কৰি দক্ষিণ আফ্ৰিকাই ভাল আৰম্ভণি কৰে। অ’পেনাৰ কুইণ্টন ডি কক আৰু ৰেজা হেণ্ড্ৰিক্সে ৬৯ ৰান সংগ্ৰহ কৰে। ডি ককে এটা মূৰে খেলি থাকিল। তেওঁ ৩৫টা বলত ৬৫ ৰান সংগ্ৰহ কৰে। ৰেজা হেণ্ড্ৰিক্স ১৩ ৰানত আউট হয়। ইয়াৰ পিছতে ডেৱাল্ড ব্ৰেভিছে ৩১ ৰান সংগ্ৰহ কৰে। এই দুজন তাৰকাৰ বাহিৰে আন কোনোৱে ৰান নাপালে।
হাৰ্দিক পাণ্ডিয়া আৰু বৰুণ চক্ৰৱৰ্তীয়ে দুই এটা ডাঙৰ অভাৰ দিলেও সমস্যাৰ সৃষ্টি নহ’ল। কাৰণ তেওঁলোকে সঠিক সময়ত কামবেক কৰিছিল। বৰুণ চক্ৰৱৰ্তীয়ে ৪টা উইকেট দখল কৰে। যশপ্ৰীত বুমৰাহে দুটা উইকেট পায়। অৰ্শদীপ সিং আৰু হাৰ্দিক পাণ্ডিয়াই এটাকৈ উইকেট দখল কৰে। ভাৰতীয় বলাৰৰ আধিপত্যৰ বাবে দক্ষিণ আফ্ৰিকাৰ ইনিংছ ৮ উইকেটত ২০১ ৰানতে সমাপ্ত হয়। ভাৰতে ৩০ ৰানত জয়লাভ কৰে।