দুটা কোঠাৰ এটা সৰু ফ্লেট। সেয়াই হেনো ইৰা ছ’চিয়েল চেৰিটেবল ট্ৰাষ্টৰ সম্পূৰ্ণ অফিচ! গাজিয়াবাদৰ এই সংস্থাই বিজেপিক ৫০ লাখ টকাৰ অনুদান দিছিল। অভিযোগ অনুসৰি, ইয়াৰ পাছতেই ত্ৰিপুৰাত ব্যক্তিগত বিশ্ববিদ্যালয় স্থাপনৰ বাবে ট্ৰাষ্টটোক অনুমতি দিয়া হয়।
ৰাজধানী আগৰতলাৰ পৰা প্ৰায় ১৫৩ কিলোমিটাৰ দূৰত, উত্তৰ ত্ৰিপুৰা জিলাৰ তিলথাই গাঁৱত সেই ‘আৰ্য্যাৱৰ্ত ইণ্টাৰনেচনেল ইউনিভাৰ্চিটি’ স্থাপন কৰা হৈছে। এই বিশ্ববিদ্যালয়ৰ বাবে ১৮ হাজাৰ বৰ্গমিটাৰ ভূমি আৱণ্টন কৰা হৈছে।
নামত ‘আন্তৰ্জাতিক’ যদিও তাত শিক্ষাৰ্থীৰ বাবে সাধাৰণ কোনো সা-সুবিধাৰ ব্যৱস্থা নাই। আনকি কেম্পাছলৈ যোৱা পথটোও ভঙা। যোৱা বছৰ অক্টোবৰ মাহত এদল শিক্ষাৰ্থীয়ে বিশ্ববিদ্যালয়খনৰ সন্মুখত প্ৰতিবাদ সাব্যস্ত কৰিছিল।
কোন নিয়মৰ অধীনত এই প্ৰতিষ্ঠানটো স্থাপন কৰা হৈছে, আৰু ইয়াৰ ইউজিচিৰ (UGC) অনুমতি আছে নে নাই— সেই তথ্য ৰাজহুৱা কৰাৰ দাবী জনোৱা হয়। সেই সময়ত বিশ্ববিদ্যালয়খনৰ আচাৰ্য্য (Chancellor) গুঞ্জন বানচল আৰু প্ৰ-আচাৰ্য্য (Pro-Chancellor) দীপক বানচলৰ সৈতে তেওঁলোকৰ বাক-বিতণ্ডা হৈছিল। ইয়াৰ পাছত বিষয়টো লৈ অনুসন্ধান কৰাত এটাৰ পাছত এটাকৈ অনিয়মৰ ছবি পোহৰলৈ আহে।
২০২৩ চনত বিশ্ববিদ্যালয়খন স্থাপন কৰা হৈছিল। দেখা গৈছে যে বিশ্ববিদ্যালয় স্থাপনৰ পূৰ্বে ট্ৰাষ্টটোৱে বিজেপিক ৩০ লাখ টকা অনুদান দিছিল। ইয়াৰ উপৰিও, ২০২২-২৩ বিত্তীয় বৰ্ষত বিশ্ববিদ্যালয়ৰ প্ৰতিষ্ঠাপক ৰমনকুমাৰ ৰোশন আৰু আচাৰ্য্য গুঞ্জনেও ১০ লাখ টকা কৈ অনুদান আগবঢ়াইছিল।
২০২৩ চনত বিধানসভা নিৰ্বাচনত জয়ী হৈ বিজেপিয়ে ত্ৰিপুৰাত দ্বিতীয়বাৰৰ বাবে ক্ষমতালৈ আহে। সেই বছৰেই বিধানসভাত আৰ্য্যাৱৰ্ত ইউনিভাৰ্চিটি স্থাপনৰ বাবে প্ৰয়োজনীয় বিল গৃহীত হয়। এই শিক্ষানুষ্ঠানখন স্থাপন হোৱাৰ পাছত কেন্দ্ৰ আৰু ত্ৰিপুৰাৰ কেইবাগৰাকীও মন্ত্ৰী আৰু বিধানসভাৰ অধ্যক্ষই সেই ঠাই পৰিদৰ্শন কৰিছে।
ইৰা ছ’চিয়েল চেৰিটেবল ট্ৰাষ্টক লৈ কেইবাটাও প্ৰশ্ন উত্থাপন হৈছে। ট্ৰাষ্টটো ২০১৫ চনত পঞ্জীয়ন কৰা হৈছিল। সদস্য হিচাপে গুঞ্জন আৰু ৰমনৰ নাম আছিল। কিন্তু গাজিয়াবাদৰ বিহাৰ নগৰ অঞ্চলৰ যি ঠিকনাত ট্ৰাষ্টটো পঞ্জীয়ন কৰা হৈছিল, সেয়া আচলতে দুটা কোঠাৰ এটা ফ্লেট। বাহিৰত ট্ৰাষ্টৰ চাইনবৰ্ড থাকিলেও ফ্লেটটো এটা পৰিয়ালে ভাড়া লৈ আছে। পৰিয়ালটোৰ সদস্যসকলে জনাইছে যে তেওঁলোকে তিনি বছৰ ধৰি তাত ভাড়া দি থাকিলেও মালিকৰ বিষয়ে বিশেষ একো নাজানে।
দেখা গৈছে যে ২০১৬ চনত গুঞ্জন আৰু ৰমনে আন দুটা ট্ৰাষ্ট খুলিছিল। তিনিওটা ট্ৰাষ্টৰ নথি-পত্ৰ একে। চৰকাৰী নথিত কামৰ পৰিসৰৰ বিষয়ে হুবহু একে কথা লিখা আছে। ২০১৫ চনত স্থাপন হোৱা এটা ট্ৰাষ্টৰ সদস্যসকলে কেনেকৈ ২০২৩ চনৰ ভিতৰত ত্ৰিপুৰাৰ শীৰ্ষ বিজেপি নেতাৰ সৈতে “বন্ধুত্ব” স্থাপন কৰিলে? এই বিষয়টোক লৈ স্বাভাৱিকতে প্ৰশ্ন উঠিছে।
আৰ্য্যাৱৰ্ত ইউনিভাৰ্চিটিৰ স্বীকৃতি, চৰকাৰী সহায় আৰু ট্ৰাষ্টৰ সৈতে বিজেপিৰ সম্পৰ্কৰ বিষয়ে ত্ৰিপুৰা চৰকাৰক কেইবাটাও লিখিত প্ৰশ্ন কৰা হৈছিল। কিন্তু কোনো উত্তৰ পোৱা নগ’ল। বৰঞ্চ সেই সকলোবোৰ প্ৰশ্ন ৰাজ্যিক নিৰ্বাচনী বিষয়াৰ (CEO) কাৰ্যালয়লৈ প্ৰেৰণ কৰা হয়। স্বাভাৱিকতে, মুখ্য নিৰ্বাচনী বিষয়াৰ কাৰ্যালয়ে এই প্ৰশ্নসমূহৰ উত্তৰ তেওঁলোকে নাজানে বুলি জনাই দিছে।