বৰদিন উপলক্ষে এক অনুষ্ঠানৰ আয়োজন কৰা হৈছিল। শিশুৰ পৰা বৃদ্ধলৈকে সকলোৱে আনন্দত মতলীয়া হৈছিল। কিন্তু হঠাৎ এক বিপৰ্যয় ঘটিল। দ্ৰুত গতিৰে অহা এখন গাড়ী ভিৰৰ মাজত সোমাই পৰে। গাড়ীখনে এজন এজনকৈ কেইবাজনো লোকক মহতিয়াই নিয়ে। ঘটনাত আতংকিত লোকসকলৰ মাজত হুৰাহুৰি লাগে।
শুকুৰবাৰে সন্ধিয়া ফ্ৰান্সৰ গুয়াডলুপৰ ছেইণ্ট-এনে (Saint-Anne)-ত এই ঘটনা সংঘটিত হয়। এই দুৰ্ঘটনাত বৰ্তমানলৈকে ১০ জন লোকৰ মৃত্যুৰ খবৰ পোৱা গৈছে। আহত হৈছে কমেও ১৯ জন। প্ৰতিবেদনত দাবী কৰা হৈছে যে ইয়াৰ ভিতৰত তিনিজনৰ অৱস্থা অতি সংকটজনক।
জানিব পৰা মতে, শ্বোৱেলচাৰ স্কোৱেৰত গীৰ্জাৰ ঠিক বিপৰীতে এই অনুষ্ঠানৰ আয়োজন কৰা হৈছিল আৰু তাতেই এই দুৰ্ঘটনাটো সংঘটিত হয়।
কিন্তু হঠাৎ গাড়ীখন কিয় ভিৰৰ মাজত সোমাই পৰিল? এই ঘটনা ইচ্ছাকৃতভাৱে কৰা হৈছিল নে গাড়ীখনে নিয়ন্ত্ৰণ হেৰুৱাইছিল?
স্থানীয় আৰক্ষীয়ে জনোৱা মতে, সকলো দিশ পৰীক্ষা কৰি থকা হৈছে। এই বিষয়ে এতিয়ালৈকে নিৰ্দিষ্টকৈ একো কোৱা নাই।
অৱশ্যে, প্ৰত্যক্ষদৰ্শীসকলে দাবী কৰিছে যে গাড়ীচালকজন হঠাৎ অসুস্থ হৈ পৰাৰ ফলতে এই দুৰ্ঘটনাটো ঘটে। কিন্তু আৰক্ষীয়ে এই বিষয়ে নিশ্চিত কৰা নাই।
ঘটনাস্থলীত বৃহৎ আৰক্ষী বাহিনী উপস্থিত হৈছে। উদ্ধাৰ অভিযান সম্পূৰ্ণ কৰা হৈছে। সমগ্ৰ অঞ্চলটো বেৰি ৰখা হৈছে। সমগ্ৰ অঞ্চলটোতে এক নিস্তব্ধতা বিৰাজ কৰিছে। কৰ্তৃপক্ষই বৰ্তমানলৈকে মৃতসকলৰ নাম প্ৰকাশ কৰা নাই।