গুৱাহাটী: ৰাষ্ট্ৰীয় শিক্ষা নীতি (NEP) ২০২০-ক বাস্তৱায়িত কৰাৰ লক্ষ্যৰে গুৱাহাটীৰ গিৰিজানন্দ চৌধুৰী বিশ্ববিদ্যালয়ত (GCU) ১৭ ডিচেম্বৰৰ পৰা তিনিদিনীয়া এক বিশেষ ‘উদ্ভাৱন ডিজাইন আৰু উদ্যমিতা’ (IDE) বুটকেম্প আনুষ্ঠানিকভাৱে আৰম্ভ হৈছে। অসমৰ বিভিন্ন প্ৰান্তৰ ‘পিএম শ্ৰী’ বিদ্যালয়সমূহৰ ১৯০ জনতকৈও অধিক অধ্যক্ষ আৰু শিক্ষকে এই প্ৰশিক্ষণ কাৰ্যসূচীত অংশগ্ৰহণ কৰিছে।
এই বুটকেম্পটো দেশৰ ২৫খন ৰাজ্য আৰু ৪খন কেন্দ্ৰীয় শাসিত অঞ্চল সামৰি লোৱা এক বৃহৎ ৰাষ্ট্ৰীয় কাৰ্যসূচীৰ অংশ। কেন্দ্ৰীয় শিক্ষা মন্ত্ৰালয়ৰ স্কুলীয়া শিক্ষা আৰু সাক্ষৰতা বিভাগ, এ আই চি টি ই (AICTE), শিক্ষা মন্ত্ৰালয়ৰ উদ্ভাৱন কোষ আৰু এন চি ই আৰ টি (NCERT)-ৰ যৌথ উদ্যোগত এই কাৰ্যসূচী ৰূপায়ণ কৰা হৈছে। নিযুক্তি সৃষ্টি আৰু উদ্যমিতাৰ ক্ষেত্ৰত কাম কৰি অহা অলাভজনক সংস্থা ‘ৱাধৱানী ফাউণ্ডেশ্যন’ৰ কাৰিকৰী সহযোগত এই বুটকেম্পৰ আয়োজন কৰা হৈছে।
গুৱাহাটীৰ এই কেন্দ্ৰটোৰ নেতৃত্ব দিছে শিক্ষা মন্ত্ৰালয়ৰ উদ্ভাৱন কোষৰ নোডেল চেন্টাৰৰ মুৰব্বী শ্ৰীনন্দজিৎ ৰাভাই। ইয়াৰ সৈতে সমন্বয় ৰক্ষা কৰিছে বিশ্ববিদ্যালয়খনৰ স্কুল অৱ ইঞ্জিনিয়াৰিং এণ্ড টেকন’লজীৰ ডিন তথা এই কাৰ্যসূচীৰ যোগাযোগ বিষয়া ড° এছ. ৰবাৰ্ট ৰবিয়ে।
বুধবাৰে AICTE আৰু DoSEL-ৰ বিশিষ্ট ব্যক্তিসকলৰ উপস্থিতিত কেন্দ্ৰীয় উদ্বোধনী অনুষ্ঠানটো পোনপটীয়া সম্প্ৰচাৰ কৰাৰ পিছতে ৰাজ্যিক পৰ্যায়ৰ কাৰ্যসূচী আৰম্ভ হয়। অনুষ্ঠানত উপস্থিত থাকি শ্ৰীমন্ত শংকৰ একাডেমী ছচাইটিৰ সভাপতি যশোদা ৰঞ্জন দাসে কয় যে যুৱ প্ৰজন্মক পৰম্পৰাগত চিন্তাৰ গণ্ডীৰ পৰা বাহিৰলৈ উলিয়াই আনি নতুন চিন্তাৰ দিশত আগবঢ়াই নিবলৈ এনে প্ৰতিষ্ঠানিক সহযোগিতাৰ অতি প্ৰয়োজন।
বিশ্ববিদ্যালয়ৰ অধ্যাপক জয়ন্ত ডেকাই শ্ৰেণীকোঠাৰ শিক্ষা আৰু গোলকীয় ষ্টাৰ্টআপ জগতৰ মাজত থকা ব্যৱধান দূৰ কৰাত বিশ্ববিদ্যালয়খনৰ ভূমিকাৰ কথা উল্লেখ কৰে। আনহাতে, অসম ৰাজ্যিক স্কুল শিক্ষা বোৰ্ডৰ সচিব নৰনাৰায়ণ নাথে মন্তব্য কৰে যে স্কুলীয়া পাঠ্যক্ৰমত ‘ডিজাইন থিংকিং’ (Design Thinking) অন্তৰ্ভুক্ত কৰাটো ভাৰতৰ ভৱিষ্যতৰ বাবে এক শক্তিশালী ভেটি স্বৰূপ হ’ব।
বৰ্তমানলৈকে দেশজুৰি SIATP, SIC, DTI, KAPILA আৰু NPPIS-ৰ দৰে বিশেষ কাৰ্যসূচীৰ জৰিয়তে ৯১,০০০ তকৈ অধিক শিক্ষক আৰু ১.১৮ লাখ ছাত্ৰ-ছাত্ৰীক এনে বুটকেম্পত সংযোগ কৰা হৈছে। চলিত এই বুটকেম্পত সমগ্ৰ ভাৰতৰ ৯,০০০ তকৈ অধিক অংশগ্ৰহণকাৰী আৰু ২১০ গৰাকী বিশেষজ্ঞ বক্তা জড়িত হৈ আছে। ইয়াৰ মূল লক্ষ্য হ’ল প্ৰতিখন পিএম শ্ৰী বিদ্যালয়ক একোটা ক্ষুদ্ৰ উদ্ভাৱন কেন্দ্ৰলৈ ৰূপান্তৰ কৰা, যাতে শিক্ষাৰ্থীসকল আত্মবিশ্বাসী সমস্যা সমাধানকাৰী (Problem Solver) হিচাপে গঢ়ি উঠিব পাৰে।
প্ৰথম দিনাৰ কাৰিকৰী অধিবেশনসমূহ ৱাধৱানী ফাউণ্ডেশ্যনৰ বিশেষজ্ঞ শ্ৰীবৎস আৰু ড০ ভাৱনা বাৰ্ডিয়াই পৰিচালনা কৰে। তেওঁলোকে শিক্ষকসকলক “Spark Quest” আৰু “D.I.S.R.U.P.T” মডেলৰ সৈতে চিনাকি কৰাই দিয়ে, যিটোৱে ছাত্ৰ-ছাত্ৰীক উদ্ভাৱনৰ জটিলতাসমূহ সহজে বুজাত সহায় কৰিব। দিনটোৰ কাৰ্যসূচী “Find It, Frame It” নামৰ এক দলীয় ক্ৰিয়া-কলাপ আৰু যুৱ প্ৰতিষ্ঠাতাসকলৰ সৈতে হোৱা এক অনুপ্ৰেৰণামূলক আলোচনা চক্ৰৰ জৰিয়তে সামৰণি পৰে।