ইৰাণৰ শান্তিৰ নোবেল বঁটা বিজয়ী তথা মানৱ অধিকাৰ কৰ্মী নাৰ্গিছ মহম্মদীক কাৰাগাৰত নিৰাপত্তাৰক্ষীয়ে প্ৰহাৰ কৰাৰ ফলত গুৰুতৰ আঘাত পোৱাত তেওঁক দুবাৰকৈ চিকিৎসালয়ত ভৰ্তি কৰিবলগীয়া হৈছিল বুলি জনিব পৰা গৈছে। তেওঁৰ পৰিয়ালৰ দ্বাৰা পৰিচালিত নাৰ্গিছ ফাউণ্ডেশ্যনে সোমবাৰে এই তথ্য প্ৰকাশ কৰে।
ফাউণ্ডেশ্যনৰ মতে, শুকুৰবাৰে তেহৰাণত পুনৰ গ্ৰেপ্তাৰ হোৱাৰ পাছত দেওবাৰে নিশা মহম্মদীয়ে কাৰাগাৰৰ পৰা পৰিয়াললৈ ফোন কৰিছিল। ফোনত তেওঁ কয় যে আঘাতসমূহ গুৰুতৰ হোৱাৰ ফলত তেওঁক দুবাৰকৈ চিকিৎসালয়ৰ জৰুৰীকালীন কক্ষলৈ লৈ যাবলগীয়া হয়। ফাউণ্ডেশ্যনে জনোৱা মতে, ফোন কৰাৰ সময়ত তেওঁৰ শাৰীৰিক অৱস্থা ভাল নাছিল, অসুস্থ যেন অনুভৱ হৈছিল।
নাৰ্গিছ মহম্মদীয়ে ২০২৩ চনত কাৰাগাৰত থাকোঁতেই ইৰাণত মহিলাৰ অধিকাৰ ৰক্ষা আৰু মৃত্যুদণ্ড বিলুপ্তিৰ দাবীত দীৰ্ঘদিনীয়া সংগ্ৰামৰ বাবে শান্তিৰ নোবেল বঁটা লাভ কৰিছিল। চিকিৎসাজনিত কাৰণত যোৱা বছৰৰ শেষৰ ফালে তেওঁক তেহৰাণৰ ইভিন কাৰাগাৰৰ পৰা অস্থায়ীভাৱে মুকলি কৰি দিয়া হৈছিল।
কিন্তু অধিবক্তা খোছৰ’ আলিকোৰ্ডিৰ সন্দেহজনক মৃত্যুৰ বিষয়ে প্ৰশ্ন উত্থাপন কৰাৰ পাছত শুকুৰবাৰে তেওঁক পুনৰ গ্ৰেপ্তাৰ কৰা হয়। ইৰাণী কৰ্তৃপক্ষৰ মতে, মাছহাদত অনুষ্ঠিত আলিকোৰ্ডিৰ স্মৃতিচাৰণ অনুষ্ঠানত মহম্মদীয়ে উত্তেজক মন্তব্য কৰি শান্তি বিঘ্নিত কৰিছিল।
ইফালে, সোমবাৰে প্ৰখ্যাত ইৰাণী চলচ্চিত্ৰ নিৰ্মাতা জাফৰ পানাহীয়ে আৰু একাংশ নাগৰিক সমাজৰ কৰ্মীয়ে নাৰ্গিছ মহম্মদীৰ তাত্ক্ষণিক আৰু বিনাচৰ্তে মুক্তিৰ দাবী জনাইছে। এই ঘটনাক লৈ ইৰাণ চৰকাৰৰ তৰফৰ পৰা তাত্ক্ষণিক কোনো মন্তব্য পোৱা হোৱা নাই।