বিহাৰ চৰকাৰৰ মন্ত্ৰী নীতিন নবীনৰ ওপৰত এতিয়া বৃহৎ দায়িত্ব। বৰ্তমান তেওঁ ভাৰতীয় জনতা পাৰ্টি বা বিজেপিৰ সৰ্বভাৰতীয় কাৰ্যকৰী সভাপতি। ৪৫ বছৰীয়া নীতিনক ইমান ডাঙৰ দায়িত্বলৈ অনাৰ পিছৰে পৰা বিজেপি কৰ্মী আৰু সাধাৰণ জনতাৰ মাজত চৰ্চা লাভ কৰিছে।
দৰাচলতে নীতিন নবীন ৰাজনৈতিক খেলপথাৰত অভিজ্ঞ বেটছমেন। পাটনাৰ বাংকীপুৰ আসনৰ পৰা ৫ বাৰ বিধানসভা নিৰ্বাচনত জয়ী হৈছে। তেওঁৰ জন্ম হৈছিল পাটনাত। তেওঁ বিজেপি নেতা তথা প্ৰাক্তন বিধায়ক নবীন কিশোৰ প্ৰসাদ সিনহাৰ পুত্ৰ। সম্প্ৰতি নবীন বিহাৰৰ নীতিশ চৰকাৰৰ মন্ত্ৰীও।
বিহাৰ নিৰ্বাচনৰ সময়ত দিয়া তথ্য অনুসৰি নবীনৰ পত্নীৰ নাম দীপমালা শ্ৰীবাস্তৱ। তেওঁৰ এজন পুত্ৰ আৰু এগৰাকী কন্যা আছে।
পিতৃৰ মৃত্যুৰ পিছৰে পৰা নীতিন নবীন সক্ৰিয়ভাৱে ৰাজনীতিত জড়িত হৈ আছে। ২০০৬ চনৰ উপ-নিৰ্বাচনৰ পৰাই তেওঁ যাত্ৰা আৰম্ভ কৰিছিল। তাৰ পিছত ২০১০, ২০১৫, ২০২০ আৰু ২০২৫ চনৰ নিৰ্বাচনত একেৰাহে জয়লাভ কৰে। ২০২৫ চনৰ বিধানসভা নিৰ্বাচনত তেওঁ লাভ কৰিছিল ৯৮,২৯৯টা ভোট। তেওঁ ৫১,৯৩৬টা ভোটত আৰজেডিৰ প্ৰাৰ্থী ৰেখা কুমাৰীক পৰাস্ত কৰে।
শপতনামা অনুসৰি নীতিন নবীন হৈছে দ্বাদশ উত্তীৰ্ণ। ১৯৯৬ চনত ছেইণ্ট মাইকেল হাইস্কুলৰ পৰা মেট্ৰিক পাছ কৰে। তাৰ পিছত চি এছ কে এম পাব্লিক স্কুলৰ পৰা ইণ্টাৰমিডিয়েট পাছ কৰে।
ছচিয়েল মিডিয়াত তেওঁ অতি সক্ৰিয়। তেওঁৰ ফেচবুক, টুইটাৰ, ইনষ্টাগ্ৰাম, লিংকডইন আৰু ইউটিউব আছে। ইয়াৰ সমান্তৰালকৈ তেওঁ ফোন আৰু হোৱাটছএপতো অতি সক্ৰিয়।
শপতনামা অনুসৰি তেওঁৰ মুঠ স্থাৱৰ সম্পত্তিৰ পৰিমাণ ৯৯,৭১,৪৭৮ টকা। তেওঁৰ পত্নীৰ স্থাৱৰ সম্পত্তি ৬৬.৫২ লাখ টকা। যদি আমি স্থাৱৰ সম্পত্তিৰ কথা কওঁ, তেন্তে নবীনৰ হাতত বেছি নাই। তেওঁৰ নামত কোনো মাটি বা অট্টালিকা নাই। যদিও তেওঁৰ পত্নীৰ নামত ১.৪৭ কোটি টকাৰ স্থাৱৰ সম্পত্তি আছে।
ইয়াৰ উপৰিও নবীনৰ ফিক্সড ডিপ’জিট আছে ৪২,৬০,৯৬১.৭৫ টকা। তেওঁৰ স্ক’ৰপিঅ’ আৰু এখন ইন’ভা ক্ৰীষ্টা আছে। ইয়াৰ উপৰিও তেওঁৰ পত্নীৰ হাতত আছে ৭০ গ্ৰাম সোণ আৰু ৪০০ গ্ৰাম ৰূপৰ গহনা। আনহাতে নবীনৰ হাতত আছে ১.৪০ লাখ টকাৰ সোণৰ গহনা।
আয়কৰ ৰিটাৰ্ণ অনুসৰি যোৱা ৫ বছৰত নীতিনৰ মুঠ বাৰ্ষিক আয় বছৰি ৩.৩৫ লাখৰ পৰা ৩.৭১ লাখ টকাৰ ভিতৰত।
কোনো গোচৰতে দোষী সাব্যস্ত হোৱা নাই বুলিও জনায় নবীনে। অৱশ্যে তেওঁৰ নামত এতিয়াও ৫টা গোচৰ বিচাৰাধীন হৈ আছে। আৰু এই গোচৰসমূহ ৰাজনীতিৰ সৈতে জড়িত বুলিও তেওঁ দাবী কৰে।