বহনক্ষম উন্নয়নৰ ক্ষেত্ৰত নেছনেল ইনষ্টিটিউট অৱ টেকন‘লজী শিলচৰে পুনৰবাৰ নিজৰ অগ্ৰণী ভূমিকা প্ৰমাণ কৰিলে। সেউজ আন্তঃগাঁথনি, সৌৰ শক্তি আৰু বহনক্ষম উন্নয়নৰ বাবে প্ৰতিষ্ঠানটোৱে শেহতীয়াকৈ প্ৰকাশ পোৱা ইউ আই গ্ৰীণমেট্ৰিক ৰেংকিং ২০২৫ত বিশ্ব ৰেংকিঙত ১৯১ নম্বৰ আৰু ভাৰতৰ ভিতৰত পঞ্চম স্থান লাভ কৰিবলৈ সক্ষম হৈছে।
তদুপৰি, এনআইটি শিলচৰে অতি গুৰুত্বপূৰ্ণ শক্তি আৰু জলবায়ু পৰিৱৰ্তন শাখাত দেশৰ ভিতৰতে দ্বিতীয় স্থান দখল কৰি এক বিশেষ গৌৰৱ অৰ্জন কৰিছে। এই সন্মান বহনক্ষম উন্নয়ন, সেউজ আন্তঃগাঁথনি নিৰ্মাণ, শক্তি-দক্ষ প্ৰযুক্তিৰ ব্যৱহাৰ, আৱৰ্জনা ব্যৱস্থাপনা আৰু জৈৱ বৈচিত্ৰ্য সংৰক্ষণৰ ক্ষেত্ৰত প্ৰতিষ্ঠানটোৰ নিৰন্তৰ প্ৰচেষ্টাৰ ফল বুলি সদৰী কৰা হৈছে।
নেছনেল ইনষ্টিটিউট অৱ টেকন‘লজী, শিলচৰৰ সঞ্চালক অধ্যাপক ডঃ দিলীপ বৈদ্যই কয় যে, এই শিক্ষানুষ্ঠানে মূলত জৈৱ বৈচিত্ৰ্য সংৰক্ষণৰ ক্ষেত্ৰত বিভিন্ন পদক্ষেপ গ্ৰহণ কৰি আহিছে। তেওঁ লগতে উল্লেখ কৰে যে সম্পূৰ্ণ শিক্ষানুষ্ঠানৰ ৩০ শতাংশ বিদ্যুৎ সৌৰ বিদ্যুৎ প্ৰকল্পৰ জৰিয়তে উৎপাদন কৰা হয়। চৌহদটোৰ ভিতৰত সৰু সৰু জলাশয় আছে, যাৰ পৰা পানী সংৰক্ষণ কৰা হয়। আৱৰ্জনা নিষ্কাশনৰ ক্ষেত্ৰত ছাত্ৰ-ছাত্ৰীয়ে গুৰুত্বপূৰ্ণ দায়িত্ব পালন কৰি আছে আৰু আৱৰ্জনাৰ পৰা সাৰো প্ৰস্তুত কৰা হয়।
তেওঁ লগতে উল্লেখ কৰে যে গ্ৰীণমেট্ৰিক ৰেংকিং ২০২৫-ৰ ভাৰতত পঞ্চম স্থান দখল কৰাৰ আঁৰত অধ্যাপক-ছাত্ৰ-ছাত্ৰী সকলোৰে সামূহিক ভূমিকা আছে।
উল্লেখ্য যে এই ৰেংকিং ব্যৱস্থাৰ মূল লক্ষ্য হৈছে বিশ্ববিদ্যালয়সমূহক বিশ্বব্যাপী মানদণ্ডৰ জৰিয়তে নিজৰ অৱস্থান মূল্যায়ন কৰাৰ সুযোগ প্ৰদান কৰা। ইয়াৰ দ্বাৰা শক্তি ব্যৱহাৰ, আৱৰ্জনা ব্যৱস্থাপনা, পৰিবহণ ব্যৱস্থা আৰু জলসম্পদৰ কাৰ্যক্ষম ব্যৱহাৰৰ দৰে ক্ষেত্ৰত উন্নতিৰ দিশসমূহ দেখুৱাই দিয়া হয়।
এই পদক্ষেপৰ অন্যতম উদ্দেশ্য হৈছে জলবায়ু পৰিৱৰ্তনৰ দৰে বিশ্বব্যাপী প্ৰত্যাহ্বানসমূহ মোকাবিলা কৰাৰ ক্ষেত্ৰত বিশ্ববিদ্যালয়সমূহৰ অগ্ৰণী ভূমিকাক আৰু অধিক শক্তিশালী কৰা। সামগ্ৰিকভাৱে, গ্ৰীণমেট্ৰিক ৰেংকিং ২০২৫ কেৱল এক ৰেংকিং তালিকা নহয়, ই উচ্চ শিক্ষানুষ্ঠানসমূহৰ বাবে এক দায়িত্বশীল নিৰ্দেশনা হিচাপে কাম কৰে, যিয়ে পৰিৱেশ সুৰক্ষা আৰু বহনক্ষম ভৱিষ্যত গঢ়ি তোলাৰ ক্ষেত্ৰত বিশ্ববিদ্যালয়সমূহৰ সক্ৰিয় অংশগ্ৰহণ নিশ্চিত কৰাত মুখ্য ভূমিকা পালন কৰে।