শেহতীয়াকৈ নাগৰিকত্ব সংশোধনী আইন, ২০১৯ ৰ অধীনত দুগৰাকী বাংলাদেশী হিন্দু ব্যক্তিক ভাৰতীয় নাগৰিকত্ব প্ৰদান কৰা হৈছে। ইয়াৰে এগৰাকী মহিলাই বৰাকত বিবাহসূত্ৰে ভাৰতীয় নাগৰিকত্ব লাভ কৰিছে।
স্থানীয় সূত্ৰ অনুসৰি, নতুনকৈ নাগৰিকত্ব লাভ কৰা দুগৰাকী ব্যক্তি হৈছে— শ্ৰীভূমি জিলাৰ বদৰপুৰৰ বেনাৰ্জী উপাধিৰ এগৰাকী মহিলা,আৰু কাছাৰ জিলাৰ শিলচৰৰ গোস্বামী উপাধিৰ এজন ৬১ বছৰীয়া ব্যক্তি।
মহিলাগৰাকী আচলতে বাংলাদেশৰ চট্টগ্ৰামৰ নিবাসী আছিল। তেওঁ ২০০৭ চনত শিলচৰ চিকিৎসা মহাবিদ্যালয়ত পৰিয়ালৰ এজন সদস্যৰ চিকিৎসাৰ বাবে ভাৰতত প্ৰৱেশ কৰিছিল। তাতে তেওঁ বদৰপুৰৰ এজন স্থানীয় চিকিৎসকক লগ পায় আৰু পিছত তেওঁৰ সৈতে বিবাহপাশত আৱদ্ধ হয়। ‘কা’ কাৰ্যকৰী হোৱাৰ পিছত তেওঁ নাগৰিকত্বৰ বাবে আবেদন কৰে আৰু শুকুৰবাৰে আনুষ্ঠানিকভাৱে ভাৰতীয় নাগৰিকত্ব লাভ কৰে। ইয়াৰ দ্বাৰা তেওঁ ‘কা’ৰ অধীনত বিবাহসূত্ৰে জাতীয়তা লাভ কৰা বৰাকৰ প্ৰথমগৰাকী ব্যক্তি হৈ পৰে।
আনজন ব্যক্তি, অৰ্থাৎ শিলচৰৰ ৬১ বছৰীয়া লোকজনে মূলতঃ বাংলাদেশৰ মৌলভীবাজাৰ জিলাৰ পৰা আহিছিল। তেওঁ ১৯৭৫ চনত পৰিয়ালৰ সৈতে ভাৰতলৈ আহি শিলচৰত থাকিবলৈ লয়। তেওঁৰ আইনী প্ৰতিনিধি ধৰ্মানন্দ দেৱৰ মতে, ‘কা’ কাৰ্যকৰী হোৱাৰ পিছত তেওঁ আবেদন কৰে আৰু শুকুৰবাৰে তেওঁকো ভাৰতীয় নাগৰিকত্ব প্ৰদান কৰা হয়।