নাগৰিকত্ব সংশোধনী আইন (CAA) কাৰ্যকৰী হোৱাৰ পিছত অসমৰ এগৰাকী বাংলাদেশী মহিলাই প্ৰথমবাৰৰ বাবে ভাৰতীয় নাগৰিকত্ব লাভ কৰিবলৈ সক্ষম হৈছে। শ্ৰীভূমি জিলাৰ বাসিন্দা ৪০ বছৰীয়া মহিলাগৰাকীয়ে ২০০৭ চনত বাংলাদেশৰ পৰা ভাৰতলৈ আহিছিল। শেহতীয়াকৈ তেওঁক আনুষ্ঠানিকভাৱে ভাৰতীয় নাগৰিকত্বৰ প্ৰমাণ পত্ৰ প্ৰদান কৰা হয়।
বিদেশী ন্যায়াধিকৰণ (এফ টি)ৰ প্ৰাক্তন সদস্য তথা শিলচৰৰ জ্যেষ্ঠ অধিবক্তা ধৰ্মানন্দ দেৱে কয় যে মহিলাগৰাকীয়ে ‘বেনীৰ্জী’ উপাধি ব্যৱহাৰ কৰে। ২০০৭ চনত শিলচৰ মেডিকেল কলেজ এণ্ড হস্পিতাললৈ আত্মীয়ৰ চিকিৎসাৰ বাবে আহিছিল। সেই সময়ত শ্ৰীভূমি জিলাৰ (পূৰ্বৰ কৰিমগঞ্জ) এজন যুৱকক লগ পাইছিল। তাৰ পিছতে বিয়া পাতিলে আৰু তাৰ পিছত মহিলাগৰাকী ভাৰততে থাকিল। তেওঁলোকৰ এজন পুত্ৰও আছে।
যদিও তেওঁৰ পৰিয়াল এতিয়াও বাংলাদেশৰ চট্টগ্ৰামত থাকে, তথাপিও মহিলাগৰাকীয়ে বহুদিনৰ পৰা ভাৰতীয় নাগৰিকত্ব লাভৰ ইচ্ছা কৰিছিল। যোৱা বছৰ CAAৰ নিয়মাৱলীৰ বিষয়ে অৱগত হোৱাৰ পিছতে তেওঁ নাগৰিকত্বৰ বাবে আবেদন কৰিছিল।
কিন্তু যোৱা বছৰৰ জুলাই মাহত দাখিল কৰা প্ৰথমখন আৱেদন নাকচ কৰা হয়। কাৰণ আছিল লোকসভা নিৰ্বাচনৰ পূৰ্বে সংঘটিত সীমা নিৰ্ধাৰণৰ সন্দৰ্ভত বিভ্ৰান্তি। বৰ্তমান বদৰপুৰ অঞ্চলৰ এটা অংশ শ্ৰীভূমি জিলাৰ পৰা আঁতৰাই কাছাৰ জিলাত অন্তৰ্ভুক্ত কৰা হয়। ইয়াৰ ফলত তেওঁৰ জিলাৰ অধিকাৰক্ষেত্ৰৰ বিষয়ে অনিশ্চয়তাৰ সৃষ্টি হৈছিল। পিছত তেওঁৰ অধিবক্তাই নতুনকৈ আবেদন দাখিল কৰিলে আৰু অৱশেষত আবেদনত অনুমোদন পালে।
ধৰ্মানন্দ দেৱে কয় যে তেওঁ অসমৰ প্ৰথমগৰাকী মহিলা যিয়ে CAAৰ অধীনত নাগৰিকত্ব লাভ কৰিছে। কেৱল সেয়াই নহয়, পঞ্জীয়ন প্ৰক্ৰিয়াৰ জৰিয়তে ৰাজ্যৰ ভিতৰতে প্ৰথমগৰাকীয়ে নাগৰিকত্ব লাভ কৰিছে।
আইনী দিশটোৰ বিষয়ে ব্যাখ্যা কৰি দেৱে কয়, “নাগৰিকত্ব আইন, ১৯৫৫ৰ ধাৰা ৫(১)(চি), ধাৰা ৬বিৰ অধীনত এই নাগৰিকত্ব প্ৰদান কৰা হৈছে। এই ধাৰাত উল্লেখ আছে যে যদি কোনো ব্যক্তি ভাৰতীয় নাগৰিকৰ সৈতে বিবাহপাশত আৱদ্ধ আৰু সাত বছৰ ভাৰতত বাস কৰি আহিছে, তেন্তে তেওঁ পঞ্জীয়নৰ জৰিয়তে ভাৰতীয় নাগৰিকত্বৰ বাবে আবেদন কৰিব পাৰিব।”
কাছাৰ জিলাৰ এজন ৬১ বছৰীয়া ব্যক্তিয়েও একে প্ৰক্ৰিয়াৰে ভাৰতীয় নাগৰিকত্ব লাভ কৰে।
ধৰ্মানন্দ দেৱে কয় যে শুকুৰবাৰে গৃহ পৰিক্ৰমা মন্ত্ৰালয়ে নাগৰিকত্বৰ প্ৰমাণ পত্ৰ প্ৰদান কৰে। দুয়োজনে ভাৰতত প্ৰৱেশ কৰাৰ দিনৰে পৰাই এই নাগৰিকত্ব কাৰ্যকৰী হৈছে। সম্ভাৱ্য সামাজিক হাৰাশাস্তিৰ কথা মনত ৰাখি তেওঁ তেওঁলোকৰ নাম প্ৰকাশ নকৰিলে।
উল্লেখ্য যে ২০১৯ চনৰ ১১ ডিচেম্বৰত নাগৰিকত্ব সংশোধনী আইনখন গৃহীত হোৱাত বিশেষকৈ অসমত এই আইনক লৈ ব্যাপক আন্দোলন আৰু প্ৰতিবাদৰ সৃষ্টি হৈছিল। যোৱা বছৰ CAA নিয়মৰ অধিসূচনা হোৱাৰ পিছৰে পৰা ৰাজ্যৰ প্ৰায় ৪০ জন লোকে এই আইনৰ অধীনত নাগৰিকত্বৰ বাবে আবেদন কৰিছে।
এই আইনৰ জৰিয়তে বাংলাদেশ, পাকিস্তান আৰু আফগানিস্তানৰ হিন্দু, খ্ৰীষ্টান, বৌদ্ধ, শিখ, জৈন আৰু পাৰ্চী সম্প্ৰদায়ৰ লোকে – যিসকলে ১৯৭১ চনৰ ২৫ মাৰ্চৰ পৰা ২০১৪ চনৰ ৩১ ডিচেম্বৰৰ ভিতৰত ভাৰতত প্ৰৱেশ কৰিছিল – নাগৰিকত্বৰ বাবে আবেদন কৰিব পাৰিব।
অসমত প্ৰায় দুই লাখ লোকক সন্দেহজনক নাগৰিক হিচাপে চিনাক্ত কৰা হৈছে। অৱশ্যে CAA ৰ অধীনত এতিয়ালৈকে আবেদনকাৰীৰ সংখ্যা তুলনামূলকভাৱে কম। মুখ্যমন্ত্রী হিমন্ত বিশ্ব শর্মাই বাৰে বাৰে কৈ আহিছে যে অসমত বসবাস কৰা অধিকাংশ হিন্দুই ১৯৭১ চনৰ কাট অফৰ পূর্বে ৰাজ্যখনলৈ প্রব্রজন কৰিছিল৷