পাকিস্তানৰ চোৰাংচোৱা সংস্থা আই এছ আইৰ প্ৰাক্তন মুৰব্বী ফইজ হামিদক দোষী সাব্যস্ত কৰা হৈছে। অৱসৰপ্ৰাপ্ত লেফটেনেণ্ট জেনেৰেলগৰাকীক সামৰিক আদালতত ১৪ বছৰৰ কাৰাদণ্ডৰ শাস্তি প্ৰদান কৰা হৈছে।
যোৱা বৃহস্পতিবাৰে এই কথা ঘোষণা কৰে পাকিস্তান সেনাই। এসময়ত হামিদ আছিল অন্যতম ক্ষমতাশালী ব্যক্তি। বিভিন্ন মহলে তেওঁৰ এই পৰিণতিক অভূতপূৰ্ব বুলি গণ্য কৰে।
ফাইজ হামিদে ২০১৯ চনৰ পৰা ২০২১ চনলৈকে বৰ্তমান কাৰাগাৰত বন্দী প্ৰাক্তন প্ৰধানমন্ত্ৰী ইমৰাণ খানৰ কাৰ্যকালতপাকিস্তানৰ চোৰাংচোৱা সংস্থাৰ নেতৃত্ব দিছিল।
তেওঁ ইমৰাণ খানৰ কঠোৰ সমৰ্থক হিচাপে পৰিচিত আছিল আৰু ২০২২ চনত খানক অনাস্থা ভোটত অপসাৰণ কৰাৰ কিছু সময়ৰ পিছতে তেওঁ আগতীয়াকৈ অৱসৰ গ্ৰহণ কৰিছিল।
পাকিস্তানৰ এজন আই এছ আইৰ মুৰব্বীক প্ৰথমবাৰৰ বাবে কোৰ্ট মাৰ্শ্বেল কৰা হৈছে। তেওঁৰ অধিবক্তাই কয় যে তেওঁ এই ৰায়ৰ বিৰুদ্ধে আপীল কৰাৰ পৰিকল্পনা কৰিছে।
পাকিস্তানী সেনাই কয় যে হামিদৰ বিৰুদ্ধে কেইবাটাও অভিযোগ উঠিছিল। প্ৰথম অভিযোগ আছিল যে শেহতীয়াকৈ তেওঁ ৰাজনীতিৰ লগত জড়িত হৈ পৰিছে। গোপন আৰু স্পৰ্শকাতৰ তথ্যৰ অপব্যৱহাৰৰ অভিযোগো উঠে হামিদৰ বিৰুদ্ধে। এই সকলো অভিযোগতে তেওঁক দোষী সাব্যস্ত কৰা হৈছে।
২০২৪ চনৰ আগষ্ট মাহত সামৰিক আদালতত হামিদৰ বিৰুদ্ধে শুনানি আৰম্ভ হৈছিল।১৫ মাহতকৈ অধিক সময়ৰ শুনানিৰ অন্তত বুধবাৰে এই আই এছ আই চোৰাংচোৱাগৰাকীক দোষী সাব্যস্ত কৰা হয়। পাকিস্তান সেনাই কয় যে শুনানিৰ সময়ত হামিদক সকলো আইনী সুবিধা দিয়া হৈছিল।
কিন্তু ইয়াতেই শেষ নহয়। পাকিস্তান কৰ্তৃপক্ষই কয় যে হামিদৰ বিৰুদ্ধে আন অভিযোগো উত্থাপন হৈছে। তাৰে এটা হ’ল হামিদ ৰাজনৈতিক অস্থিৰতাৰ সৃষ্টি কৰা আৰু পাকিস্তানৰ স্থিতাৱস্থা বিঘ্নিত কৰাৰ ষড়যন্ত্ৰত জড়িত আছিল। দাবী কৰা হৈছে যে তেওঁ কেইবাজনো ৰাজনৈতিক নেতাৰ সহযোগত এই কাম কৰিছিল। এই সকলোবোৰ অভিযোগৰ তদন্ত চলি থকা বুলি পাকিস্তান প্ৰশাসনে প্ৰকাশ কৰিছে।