কেন্দ্ৰৰ নৰেন্দ্ৰ মোডী চৰকাৰে উচ্চ শিক্ষাৰ বিভিন্ন বিভাগক এইবাৰ এটা কৰ্তৃপক্ষৰ অধীনলৈ আনিব বিচাৰিছে। সেই উদ্দেশ্যে ‘বিকশিত ভাৰত শিক্ষা কৰ্তৃপক্ষ বিধেয়ক’ মন্ত্ৰীসভাত গৃহীত হয়।
শীতকালীন অধিৱেশনতে সংসদত দাখিল কৰিব পাৰে বিধেয়কখন। কেন্দ্ৰই অধিৱেশনৰ অন্তিম দিনা হায়াৰ এডুকেশ্যন কমিছন অফ ইণ্ডিয়া ২০২৫ (এইচ ই চি আই) বিধেয়কখন দাখিল কৰাৰ পৰিকল্পনা কৰিছে।
মূলতঃ উচ্চ শিক্ষাৰ ক্ষেত্ৰত জটিলতা হ্ৰাস কৰিবলৈ পৃথক পৃথক সংস্থাৰ জটিলতা কমাই উচ্চ শিক্ষাৰ ক্ষেত্ৰত এটা মাত্ৰ সংস্থা গঢ়ি তোলাৰ পৰিকল্পনা কৰা হৈছে। এই আইনখনৰ লক্ষ্য হৈছে ইউজিচি, এআইচিটিই আৰু এনচিটিইৰ দৰে সংস্থাসমূহ বিলুপ্ত কৰি উচ্চ শিক্ষাক এটা সংস্থাৰ নিয়ন্ত্ৰণলৈ অনা।
এতিয়ালৈকে ইউজিচিয়ে সাধাৰণ উচ্চ শিক্ষাৰ সৈতে জড়িত বিষয়সমূহ নিয়ন্ত্ৰণ কৰিছিল। AICTE অৰ্থাৎ অল ইণ্ডিয়া কাউন্সিল ফৰ টেকনিকেল এডুকেচনৰ হাতত আছিল কাৰিকৰী আৰু পৰিচালনা শিক্ষা। এন চি টি ই অৰ্থাৎ নেচনেল কাউন্সিল ফৰ টিচাৰ্ছ এডুকেচনে শিক্ষকৰ শিক্ষণৰ চোৱাচিতা কৰিছিল।
এই সকলোবোৰ এতিয়া প্ৰস্তাৱিত ৰাষ্ট্ৰীয় উচ্চ শিক্ষা আয়োগৰ তত্বাৱধানত আহিব। কেৱল চিকিৎসা আৰু আইন শিক্ষা আয়োগৰ পৰিসৰৰ বাহিৰত থাকিব।
কেন্দ্ৰৰ এই নতুন সিদ্ধান্ত সম্পূৰ্ণৰূপে ৰাষ্ট্ৰীয় শিক্ষা নীতিৰ অনুকূল। জনা যায় যে গঠন হ’বলগীয়া নতুন শিক্ষা ব’ৰ্ডখনে ইউজিচিৰ দৰে উচ্চ শিক্ষাৰ সৈতে জড়িত সকলো বিষয় নিয়ন্ত্ৰণ কৰিব।
কোনবোৰ শিক্ষানুষ্ঠানক স্বীকৃতি দিয়া হ’ব, কেনেকৈ পৰীক্ষা অনুষ্ঠিত হ’ব, আৰু শিক্ষক নিযুক্তিৰ কাম সকলো ঐক্যবদ্ধ এই ব’ৰ্ডৰ দ্বাৰা নিয়ন্ত্ৰিত হ’ব। ইয়াতেই শেষ নহয়, অনাগত দিনত মাধ্যমিক আৰু উচ্চতৰ মাধ্যমিক শিক্ষা ব্যৱস্থাকো একেখন ব’ৰ্ডৰ অধীনলৈ অনাৰ উদ্যোগ লৈছে কেন্দ্ৰই।