জুবিন গাৰ্গৰ মৃত্যুৰ ঘটনাই সৃষ্টি কৰা চাঞ্চল্যৰ মাজতে আজি বিশেষ অনুসন্ধানকাৰী দল (এছআইটি)-এ আদালতত ২৫০০ পৃষ্ঠাৰ মূল চাৰ্জশ্বীট দাখিল কৰে। মুঠ ১২ হাজাৰ পৃষ্ঠাৰ চাৰ্জশ্বীটত ডিজিটেল তথ্য-প্ৰমাণ, সাক্ষ্যকে ধৰি অন্যান্য তথ্য সন্নিৱিষ্ট কৰা হৈছে। এই সন্দৰ্ভত এছআইটিৰ মুৰব্বী মুন্না প্ৰসাদ গুপ্তাই এক সংবাদমেলযোগে বিশদ তথ্য দাঙি ধৰে।
সংবাদমেলত এছডিজিপি মুন্না প্ৰসাদ গুপ্তাই জনোৱা অনুসৰি, এই ঘটনাত অভিযুক্ত কেইবাজনো ব্যক্তিৰ বিৰুদ্ধে ভাৰতীয় ন্যায় সংহিতা (BNS)-ৰ বিভিন্ন ধাৰা আৰোপ কৰা হৈছে। সিদ্ধাৰ্থ শৰ্মাৰ বিৰুদ্ধে BNSৰ ৩(৬)(৭)(৮), ৬১(২) (অপৰাধমূলক ষড়যন্ত্ৰ), ১০৩(১) (হত্যা), আৰু বিত্তীয় খেলিমেলিৰ বাবে ৩১৬(৫) ধাৰা লগোৱা হৈছে।
আনহাতে, শ্যামকানু মহন্তৰ বিৰুদ্ধে BNSৰ ৩০৮(২), ৩১৮(৪), ২৩৮, ৩(৬)(৭)(৮), ৬১(২), ১০৩ ধাৰা আৰোপ কৰা হৈছে। শেখৰজ্যোতি গোস্বামীৰ বিৰুদ্ধে ৩(৬)(৭)(৮), ৬১(২), ১০৩, ৩১৬(৫) ধাৰা আৰু অমৃতপ্ৰভা মহন্তৰ বিৰুদ্ধে ৩(৬)(৭)(৮), ৬১(২), ১০৩, ২৩৮ ধাৰা আৰোপ কৰা হৈছে। সন্দীপন গাৰ্গৰ বিৰুদ্ধে ১০৫ ধাৰা, আৰু দেহৰক্ষী নন্দেশ্বৰ বৰা তথা পৰেশ বৈশ্যৰ বিৰুদ্ধে ৬১(২), ৩১৬(৫) ধাৰা আৰোপ কৰা হৈছে।
চাৰ্জশ্বীটত চাৰিজন অভিযুক্ত – সিদ্ধাৰ্থ শৰ্মা, শ্যামকানু মহন্ত, শেখৰজ্যোতি গোস্বামী আৰু অমৃতপ্ৰভা মহন্তৰ বিৰুদ্ধে ১০৩ ধাৰাৰ অধীনত হত্যাৰ অভিযোগ আৰোপ কৰা হৈছে। তেওঁলোকৰ বিৰুদ্ধে BNSৰ ৩(৬,৭,৮) ধাৰা (কমন ইন্টেন্সন বা একেলগে মিলি এটা অপৰাধ সংঘটিত কৰা), ৬১(২) ধাৰা (অপৰাধমূলক ষড়যন্ত্ৰ) আৰু ৩১৬(৫) ধাৰা (বিত্তীয় ষড়যন্ত্ৰ আৰু অপৰাধমূলক বিশ্বাসঘাতকতা) আৰোপ কৰা হৈছে। ইয়াৰ উপৰিও, শ্যামকানু আৰু অমৃতপ্ৰভাৰ বিৰুদ্ধে তথ্য-প্ৰমাণ নষ্ট কৰাৰ বাবে ২৩৮ ধাৰা অতিৰিক্তভাৱে লগোৱা হৈছে। শ্যামকানুৰ বিৰুদ্ধে ধনদাবীৰ ৩০৮(২) আৰু প্ৰৱঞ্চনাৰ ৩১৮(৪) ধাৰাও আৰোপ কৰা হৈছে।
মৃত্যুসম অপৰাধৰ বিচাৰৰ বিধান থকা BNSৰ ১০৫ ধাৰা সন্দীপন গাৰ্গৰ বিৰুদ্ধে আৰোপ কৰা হৈছে। আনহাতে, দেহৰক্ষী নন্দেশ্বৰ বৰা আৰু পৰেশ বৈশ্যৰ বিৰুদ্ধে অপৰাধমূলক ষড়যন্ত্ৰৰ ধাৰা (৬১/২) আৰু অপৰাধমূলক বিশ্বাসঘাতকতাৰ ধাৰা (৩১৬/৫) আৰোপ কৰা হৈছে।