অৱশেষত দেশখনৰ নিৰ্বাচন আয়োগে বাংলাদেশৰ সাধাৰণ নিৰ্বাচনৰ দিন ঘোষণা কৰিছে। অহা ১২ ফেব্ৰুৱাৰীত ত্ৰয়োদশ ৰাষ্ট্ৰীয় সংসদীয় নিৰ্বাচনৰ ভোটগ্ৰহণ অনুষ্ঠিত হ’ব। সেইদিনা জুলাইৰ ৰাষ্ট্ৰীয় চনদ ৰূপায়ণৰ ক্ষেত্ৰতো গণভোট অনুষ্ঠিত হ’ব। সেইদিনা পুৱা ৭:৩০ বজাৰ পৰা বিয়লি ৪:৩০ বজালৈ ভোটদান চলিব।
বৃহস্পতিবাৰে (১১ ডিচেম্বৰ) সন্ধিয়া ৬ বজাত দেশবাসীক দিয়া ভাষণত মুখ্য নিৰ্বাচন আয়ুক্ত এ এম এম নাছিৰ উদ্দিনে ভোটদানৰ তাৰিখ ঘোষণা কৰে। তেওঁৰ ভাষণ বাংলাদেশ টেলিভিছন আৰু বাংলাদেশ অনাতাঁৰত সম্প্ৰচাৰিত হয়।
এই নির্বাচনত মুঠ ভোটাৰৰ সংখ্যা ১২ কোটি ৭৬ লাখতকৈ অধিক বুলি আয়োগে প্রকাশ কৰে৷ বিদেশত থকা বাংলাদেশী ভোটাৰসকলেও ডাক বেলটৰ জৰিয়তে ভোটদানৰ সুযোগ লাভ কৰিছে। এই পৰ্যন্ত তিনি লাখৰো অধিক প্ৰবাসী ভোটাৰে ভোটদানৰ বাবে পঞ্জীয়ন কৰিছে।
আয়োগে কয় যে মনোনয়ন দাখিলৰ অন্তিম তাৰিখ ২৯ ডিচেম্বৰ।৩০ ডিচেম্বৰৰ পৰা ৪ জানুৱাৰীলৈ মনোনয়নৰ পৰীক্ষা হ’ব। ৰিটাৰ্নিং বিষয়াৰ সিদ্ধান্তৰ বিৰুদ্ধে ১১ জানুৱাৰীলৈকে আপীল দাখিল কৰিব পাৰিব। ১২ জানুৱাৰীৰ পৰা ১৮ জানুৱাৰীৰ ভিতৰত আপীল নিষ্পত্তি হ’ব। প্ৰাৰ্থিত্ব প্ৰত্যাহাৰৰ শেষ তাৰিখ ২০ জানুৱাৰী। প্ৰতীক আবণ্টন হ’ব ২১ জানুৱাৰীত। ২২ জানুৱাৰীৰ পৰা আৰম্ভ হ’ব নিৰ্বাচনী প্ৰচাৰ। ১০ ফেব্ৰুৱাৰীৰ পুৱা ৭:৩০ বজালৈকে প্ৰচাৰ চলাব।
বিগত বছৰৰ ৫ আগষ্টত বাংলাদেশত ছাত্ৰ-জনসাধাৰণৰ বিদ্ৰোহৰ সন্মুখীন হৈ শ্বেখ হাছিনাৰ আৱামি লীগ চৰকাৰ উৎখাত হয়। ৮ আগষ্টত অধ্যাপক মহম্মদ ইউনুছৰ নেতৃত্বত এখন অন্তৱৰ্তীকালীন চৰকাৰে শপত গ্ৰহণ কৰে। অন্তৱৰ্তীকালীন চৰকাৰখনে কাৰ্যভাৰ গ্ৰহণ কৰাৰ ১৬ মাহৰ পাছত ৰাষ্ট্ৰীয় নিৰ্বাচনৰ দিন নিৰ্ধাৰণ কৰিছে নিৰ্বাচন আয়োগে।
প্ৰথম অৱস্থাত বিএনপিকে ধৰি একাংশ দলে যোৱা বছৰৰ ডিচেম্বৰৰ ভিতৰত ৰাষ্ট্ৰীয় নিৰ্বাচন অনুষ্ঠিত কৰিবলৈ দাবী জনাইছিল। ৬ জুনত দেশবাসীক দিয়া ভাষণত মুখ্য উপদেষ্টা অধ্যাপক মহম্মদ ইউনুছে কয় যে ২০২৬ চনৰ এপ্ৰিল মাহৰ প্ৰথমাৰ্ধত নিৰ্বাচন অনুষ্ঠিত হ’ব। তাৰ পিছত ১৩ জুনত বিএনপিৰ ভাৰপ্ৰাপ্ত অধ্যক্ষ তাৰিক ৰহমানে লণ্ডনত মুখ্য উপদেষ্টাগৰাকীক সাক্ষাৎ কৰে। সেই বৈঠকত ২০২৬ চনৰ ফেব্ৰুৱাৰী মাহৰ প্ৰথমাৰ্ধত ৰাষ্ট্ৰীয় নিৰ্বাচনক লৈ দুয়োৰে মাজত একমত হৈছিল।
তেতিয়াৰ পৰা চৰকাৰে বাৰে বাৰে কৈ আহিছে যে ফেব্ৰুৱাৰী মাহৰ প্ৰথমাৰ্ধত ৰাষ্ট্ৰীয় নিৰ্বাচন অনুষ্ঠিত হ’ব। সেই উদ্দেশ্যে নিৰ্বাচন আয়োগেও প্ৰস্তুতি আগবঢ়াই লৈ যায়। ইফালে, ১৩ নৱেম্বৰত মুখ্য উপদেষ্টাগৰাকীয়ে ঘোষণা কৰে যে ফেব্ৰুৱাৰী মাহৰ প্ৰথমাৰ্ধত একেদিনাই জুলাইৰ ৰাষ্ট্ৰীয় চনদ ৰূপায়ণ আৰু ৰাষ্ট্ৰীয় সংসদীয় নিৰ্বাচনৰ গণভোট অনুষ্ঠিত হ’ব। বৃহস্পতিবাৰে মুখ্য নিৰ্বাচনী আয়ুক্তই দেশবাসীক দিয়া ভাষণত এই দুয়োটা নিৰ্বাচনৰ তাৰিখ ঘোষণা কৰে।