কিছুদিন পূৰ্বে দলিতেৰন্ধা খাদ্য খাইছিল ৰাজ্যৰ এগৰাকী মন্ত্ৰীয়ে। কিন্তু সাধাৰণ মানুহে সেই দলিতৰ হাতেৰে খাদ্য খাই ৰোষৰ বলি হ’ল সমাজৰ। দলিত পৰিয়ালৰ সৈতে আহাৰ গ্ৰহণ কৰাৰ বাবে এগৰাকী আৰএছএছ কৰ্মী আৰু তেওঁৰ পৰিয়ালক সমাজৰ পৰা বৰ্জন কৰা হ’ল। ঘটনাটো সংঘটিত হৈছে বিজেপি শাসিত ৰাজ্যত।
সৰ্বভাৰতীয় সংবাদ মাধ্যমৰ সূত্ৰ অনুসৰি, ঘটনাটো মধ্যপ্ৰদেশৰ ৰাইসেন জিলাৰ এখন গাঁৱত ঘটিছে। ভৰত ৰাজ ধকড় নামৰ এজন আৰএছএছ কৰ্মীয়ে জনাইছে যে তেওঁ আৰু তেওঁৰ পৰিয়ালক গোটেই গাঁৱখনে সামাজিকভাবে বৰ্জন কৰিছে। কাৰণ তেওঁ আৰু তেওঁৰ দুজন আত্মীয়ই এটা দলিত পৰিয়ালৰ সৈতে একেলগে আহাৰ গ্ৰহণ কৰিছিল।
এই দলিত পৰিয়ালটোত বিবাহৰ অনুষ্ঠান আছিল। তাতে ভৰত আৰু তেওঁৰ আত্মীয়সকল গৈছিল। তাতে খাদ্য খোৱাৰ পিছতে গ্ৰামবাসীয়ে তেওঁলোকক বৰ্জন কৰাৰ কথা ঘোষণা কৰে। ভৰতে জনাইছে যে পিপাৰিয়া পাউৰিয়া গাঁৱৰ সন্তোষ পাৰোল নামৰ এজন বাসিন্দাৰ ঘৰত তেওঁলোকে আহাৰ গ্ৰহণ কৰিছিল।
ভৰত, মনোজ পেটেল, আৰু শিক্ষক সত্যেন্দ্ৰ ৰঘুবংশীয়ে সন্তোষৰ ঘৰত খাদ্য খায়। সেই আহাৰ গ্ৰহণৰ ভিডিঅ’টো সত্যেন্দ্ৰই ৰেকৰ্ড কৰিছিল। যি পিছত ছ’চিয়েল মিডিয়াত ভাইৰেল হৈ পৰে। ভিডিঅ’টো দৃষ্টিগোচৰ হোৱাৰ লগে লগে কেইজনমান গ্ৰামবাসীয়ে তীব্ৰ প্ৰতিক্ৰিয়া প্ৰকাশ কৰে।
ভৰতে জনাইছে যে এই ঘটনাৰ পিছতে পঞ্চায়তৰ এখন বৈঠক বহে। সেই বৈঠকত পঞ্চায়তৰ মুৰব্বীসহ কেইজনমান প্ৰভাৱশালী গ্ৰামবাসী উপস্থিত আছিল। তাতেই ভৰতহঁতক উদ্দেশ্যি কোৱা হয়, ‘দলিত পৰিয়ালৰ খাদ্য স্পৰ্শ কৰাটোও পাপ।’ বৈঠকত বহুতে প্ৰস্তাৱ দিয়ে যে তিনিজনৰে শুদ্ধিকৰণৰ প্ৰয়োজন আছে। তিনিওজনকে গংগাস্নান কৰাৰ নিৰ্দেশ দিয়া হয়।
পঞ্চায়তৰ চাপত পৰি সত্যেন্দ্ৰ আৰু মনোজ নিৰ্দেশ মানি গংগাস্নান কৰে। কিন্তু ভৰতে তাত সন্মতি নিদিলে। তেওঁ স্পষ্টকৈ জনাই দিলে যে এই নিৰ্দেশ সম্পূৰ্ণৰূপে অসাংবিধানিক। ইয়াৰ পিছতে ভৰত আৰু তেওঁৰ পৰিয়ালক বৰ্জন কৰা হয়। এতিয়াৰ পৰা গাঁৱৰ কোনো অনুষ্ঠানলৈ তেওঁলোকক নিমন্ত্ৰণ জনোৱা নহয়। কোনেও তেওঁলোকৰ সৈতে কথা নাপাতে। যাৰ ফলত তেওঁলোকে দিনে দিনে চূড়ান্ত অপমানৰ সন্মুখীন হৈছে। আৰক্ষীৰ ওচৰত অভিযোগ জনাইও কোনো সহাঁৰি পোৱা নাই।
ৰাজ্যৰ মন্ত্ৰী নৰেন্দ্ৰ শিৱাজী পেটেলৰ বিধানসভা এলেকা উদয়পুৰাতেই এই ঘটনাটো ঘটিছে। কিছুদিন পূৰ্বে এই মন্ত্ৰীগৰাকীয়েও এটা দলিত পৰিয়ালৰ ঘৰত গৈ আহাৰ গ্ৰহণ কৰিছিল। শান্তিপূৰ্ণ সহাৱস্থানৰ বাৰ্তা দিবলৈকে তেওঁ দলিতে ৰন্ধা খাদ্য খাইছিল। ইয়াৰ পিছতো গ্ৰামবাসীয়ে সেই বাৰ্তা গ্ৰহণ নকৰিলে।
জিলা উপায়ুক্ত অৰুণ কুমাৰ বিশ্বকৰ্মাই জনাইছে যে এই ঘটনাত ইতিমধ্যে এফআইআৰ দাখিল কৰা হৈছে। দোষীৰ বিৰুদ্ধে অতি শীঘ্ৰেই কঠোৰ ব্যৱস্থা লোৱা হ’ব।