চৰকাৰী চাকৰি, কল্যাণমূলক আঁচনি আৰু স্থানীয় নিৰ্বাচনত অংশগ্ৰহণৰ ক্ষেত্ৰত অসম চৰকাৰে “জনসংখ্যা আৰু নাৰী সবলীকৰণ নীতি (সংশোধনী), ২০২৫” কাৰ্যকৰী কৰিছে। এই সন্দৰ্ভত ৰাজ্যৰ আয়ুক্ত আৰু সচিব ড° পি. অশোক বাবুৱে আনুষ্ঠানিক নিৰ্দেশনা জাৰি কৰিছে।
সংশোধিত নীতি অনুসৰি এতিয়া ৰাজ্যিক চৰকাৰৰ চাকৰি অথবা কল্যাণমূলক আঁচনিৰ সুবিধা বিচৰা সকলো ব্যক্তিয়ে বাধ্যতামূলকভাৱে দুই সন্তানৰ নীতি মানি চলিব লাগিব। এই বিধান বৰ্তমানৰ চৰকাৰী কৰ্মচাৰীসকলৰ ক্ষেত্ৰতো প্ৰযোজ্য হ’ব।
এই নীতিত স্পষ্টকৈ উল্লেখ কৰা হৈছে যে দুইতকৈ অধিক সন্তান জন্ম দিলে শিশুটোক কোনো ধৰণে অস্বীকাৰ কৰা (disowning) বৈধ নহ’ব। বিশেষ পৰিস্থিতি যেনে একাধিক সন্তান একেলগে জন্ম হওঁতে (যমজ বা জঁটুল জন্ম) বা বিশেষভাৱে সক্ষম শিশুৰ ক্ষেত্ৰত চৰকাৰে বিশেষ বিবেচনা কৰিব বুলি উল্লেখ কৰিছে।
অৱশ্যে, কিছুমান নিৰ্দিষ্ট সম্প্ৰদায়ৰ ক্ষেত্ৰত চৰকাৰে শিথিলতাৰ ব্যৱস্থা ৰাখিছে। অনুসূচিত জনজাতি (ST), অনুসূচিত জাতি (SC), চাহ জনগোষ্ঠী, লগতে মৰাণ আৰু মটক সম্প্ৰদায়ৰ লোকসকলে চৰকাৰী চাকৰি আৰু সুবিধাৰ ক্ষেত্ৰত যোগ্যতা বজাই ৰাখি তিনিটা পৰ্যন্ত সন্তান জন্ম দিব পাৰিব।
আনহাতে, চৰকাৰে এইটোও প্ৰস্তাৱ আগবঢ়াইছে যে দুটাতকৈ অধিক সন্তান থকা ব্যক্তি পঞ্চায়ত আৰু পৌৰসভাৰ নিৰ্বাচনত প্ৰতিদ্বন্দ্বিতা কৰিবলৈ অযোগ্য বুলি গণ্য কৰা হ’ব।