মুখ্যমন্ত্ৰী ড° হিমন্ত বিশ্ব শৰ্মাই শুকুৰবাৰে সদৰী কৰে যে কণ্ঠশিল্পী জুবিন গাৰ্গৰ মৃত্যুৰ তদন্ত কৰা বিশেষ অনুসন্ধানকাৰী দল চমুকৈ এছ আই টিয়ে তেওঁলোকৰ তদন্ত সম্পূৰ্ণ কৰি প্ৰায় ৩,৫০০ পৃষ্ঠাৰ অভিযোগনামা প্ৰস্তুত কৰিছে।
শৰ্মাই জনোৱা মতে, অহা ৬ ডিচেম্বৰৰ পৰা ১২ ডিচেম্বৰৰ ভিতৰত অভিযোগনামা দাখিল কৰাৰ সম্ভাৱনা আছে।
আজি ডিমা হাছাওত এচিএ ষ্টেডিয়াম উদ্বোধন কৰি সংবাদ মাধ্যমৰ আগত মুখ্যমন্ত্ৰীয়ে কয় যে পৰৱৰ্তী পদক্ষেপ চূড়ান্ত কৰাৰ বাবে এডভোকেট জেনেৰেলৰ সৈতে এখন বৈঠক অনুষ্ঠিত হৈছিল।
তেওঁ নিৰ্দিষ্ট সময়সীমাৰ ভিতৰত অভিযোগনামা দাখিল কৰাৰ সম্পৰ্কত গুৰুত্ব আৰোপ কৰি কয়, “১৮ ডিচেম্বৰৰ আগতে আমি নথি-পত্ৰসমূহ লাভ কৰা উচিত; অন্যথা বৰ্তমান জেলত থকা অভিযুক্তসকলে জামিন লাভ কৰিব পাৰে।”
আজি শৰ্মাই পুনৰ কয় যে শিল্পীগৰাকীৰ মৃত্যু নিশ্চিতভাৱে এটা হত্যাৰ ঘটনা।
নৱেম্বৰ মাহৰ ২৫ তাৰিখে অনুষ্ঠিত বিধানসভা অধিৱেশনতো তেওঁ ঘোষণা কৰিছিল যে এই মৃত্যু এক হত্যা, আৰু ২৭ ছেপ্টেম্বৰত আৰম্ভ হোৱা এছ আই টিৰ তদন্তৰ তৃতীয় দিনাৰে পৰা চৰকাৰে ইয়াক হত্যাৰূপে শ্ৰেণীভুক্ত কৰিছিল।
শৰ্মাই এছ আই টিৰ তদন্তৰ ওপৰত আস্থা প্ৰকাশ কৰি কয় যে তদন্তত বহু তথ্য পোহৰলৈ আহিছে। এজন ব্যক্তিয়ে এই হত্যা কাণ্ড সংঘটিত কৰিছে, আন কেইজনমানে সহায় কৰিছে। এতিয়া চৰকাৰীভাৱে ‘হত্যা’ শব্দটো লিপিবদ্ধ হৈছে,” তেওঁ কয়।
তেওঁ এইটোও স্পষ্ট কৰে যে অভিযোগনামা দাখিল কৰাৰ পিছতো তদন্ত অব্যাহত থাকিব যাতে ইয়াৰ লগত জড়িত সকলোকে চিনাক্ত কৰি ন্যায়ৰ আওতালৈ আনিব পৰা যায়। শৰ্মাই লগতে কয়, “আদালতে চূড়ান্ত ৰায়দান কৰিব, কিন্তু বাকী থকা যিকোনো তথ্য পোহৰলৈ আনিবলৈ তদন্ত চলি থাকিব।”