উত্তৰ প্ৰদেশৰ মেৰুটৰ এটা আচৰিত ঘটনা পোহৰলৈ আহিছে। দাড়ি কটাক লৈ হোৱাৰ সমস্যাৰ বাবেইও ভাঙি থান বান হ’ল এখন সুখৰ সংসাৰ।
মহম্মদ সাগিৰ নামৰ এজন যুৱকে অভিযোগ কৰিছে যে তেওঁৰ পত্নী আৰ্শীয়ে তেওঁ দাঢ়ি কাটিবলৈ অস্বীকাৰ কৰাৰ বাবেই ঘৰৰ পৰা পলাই গৈছিল। সাগিৰৰ অভিযোগ যে তেওঁৰ পত্নীয়ে ক্লিন শ্বেভ কৰা পুৰুষক বেছি ভাল পায়, যাৰ বাবে তেওঁ সাগিৰৰ সৰু ভায়েক ছাবিৰৰ প্ৰেমত পৰে আৰু তেওঁৰ সৈতে ঘৰ এৰি যায়।
সাগিৰে জনোৱা মতে, বিয়াৰ পিছৰে পৰা আৰ্শীয়ে তেওঁৰ দাঢ়িৰ বাবে অস্বস্তি প্ৰকাশ কৰিছিল আৰু বাৰে বাৰে দাঢ়ি কাটিবলৈ কৈছিল। কিন্তু সাগিৰে দাঢ়ি ৰাখিবলৈ ভাল পাইছিল আৰু কাটিবলৈ ইচ্ছুক নাছিল। প্ৰথমতে এইটো কেৱল ৰুচিৰ পাৰ্থক্য আছিল যদিও ক্ৰমান্বয়ে ই তেওঁলোকৰ দৈনিক কাজিয়াৰ কাৰণ হৈ পৰিছিল।
সাগিৰে দাবী কৰিছে যে এই সময়ছোৱাত আৰ্শী তেওঁৰ ভায়েক ছাবিৰৰ সৈতে ঘনিষ্ঠ হৈ পৰে আৰু সুযোগ বুজি তেওঁ ছাবিৰৰ সৈতে পলাই যায়। পত্নীক বিচাৰি নাপাই আৰু তিনি মাহ ধৰি কোনো খবৰ নোপোৱাত সাগিৰে অৱশেষত আৰক্ষীৰ কাষ চাপি নিৰুদ্দেশৰ অভিযোগ দাখিল কৰে। তেওঁ লগতে দাবী কৰে যে তেওঁৰ হাতত আৰ্শী আৰু ছাবিৰৰ কথোপকথনৰ ৰেকৰ্ডিং আছে, য’ত দুয়োজনে সাগিৰক বিহ দি হত্যা কৰি তেওঁলোকৰ সম্পৰ্কক বৈধতা দিবলৈ পৰিকল্পনা কৰিছিল।
অৱশ্যে, বুধবাৰে ঘটনাটোৱে এক নতুন মোৰ লয়, যেতিয়া আৰ্শী প্ৰেমিক ছাবিৰৰ সৈতে তেওঁৰ পিতৃ-মাতৃৰ ঘৰত উপস্থিত হয় আৰু স্পষ্ট কৰি দিয়ে যে তেওঁ আৰু সাগিৰৰ সৈতে থাকিব নিবিচাৰে।
আৰ্শীয়ে সাগিৰৰ দাঢ়ি সম্পৰ্কীয় সকলো অভিযোগ সম্পূৰ্ণৰূপে অস্বীকাৰ কৰি কয় যে আচল সমস্যা তেওঁৰ স্বামীৰ যৌন অক্ষমতা, আৰু সেইবাবেই তেওঁ এই বিবাহিত জীৱন আগুৱাই নিব নিবিচাৰে। এই অপমানজনক অভিযোগত ক্ষুব্ধ হৈ সাগিৰে আৰক্ষীৰ উপস্থিতিতে আৰ্শীক বিবাহ বিচ্ছেদ দিয়ে।
আনহাতে, আৰ্শীয়েও দাবী কৰিছে যে বিয়াৰ সময়ত যৌতুক হিচাপে অনা পাঁচ লাখ টকা সাগিৰে ঘূৰাই নিদিয়ালৈকে তেওঁ এই বিবাহ বিচ্ছেদ মানি নলয়। তেওঁৰ মতে, কমেও আঢ়ৈ লাখ টকা ঘূৰাই দিলেহে তেওঁ স্বামীক এৰি ছাবিৰৰ সৈতে নতুন জীৱন আৰম্ভ কৰিব। অন্যথা, তেওঁ বিবাহ বিচ্ছেদ নামানে আৰু একেখন ঘৰতে ছাবিৰৰ সৈতে থাকিব বিচাৰিব।
সমগ্ৰ ঘটনাটো পোহৰলৈ অহাত অঞ্চলটোত ব্যাপক চাঞ্চল্যৰ সৃষ্টি হৈছে আৰু ছচিয়েল মিডিয়াত এই বিষয়ে তীব্ৰ আলোচনা চলিছে।