তেজপুৰ বিশ্ববিদ্যালয়ৰ কৰ্তৃপক্ষই কেম্পাছত চলি থকা সংকট সন্দৰ্ভত অসমৰ মুখ্যমন্ত্ৰীৰ শেহতীয়া বক্তব্যক খণ্ডন কৰিছে। তেওঁৰ উপ-উপাচাৰ্য (Pro-VC) নিযুক্তিৰ পৰামৰ্শই আন্দোলনৰ দীৰ্ঘদিনীয়া আৰু বাৰে বাৰে উত্থাপিত মুখ্য দাবী, অৰ্থাৎ এজন কাৰ্যবাহী উপাচাৰ্য (Acting Vice Chancellor) নিযুক্তিৰ জৰুৰী প্ৰয়োজনীয়তা এই সম্পৰ্কে মুখ্যমন্ত্ৰীৰ এক স্পষ্ট ভুল ধাৰণাক প্ৰতিফলিত কৰিছে।
৭৬ দিন ধৰি তেজপুৰ বিশ্ববিদ্যালয় অস্থিৰ হৈ পৰিছে। এই সমগ্ৰ সময়ছোৱাত অসমৰ মাননীয় মুখ্যমন্ত্ৰী হিমন্ত বিশ্ব শৰ্মাই মৌনতা অৱলম্বন কৰি আহিছে। বিশ্ববিদ্যালয়খনৰ পৰিস্থিতিয়ে ৰাষ্ট্ৰীয় দৃষ্টি আকৰ্ষণ কৰাৰ পিছত হঠাতে মুখ্যমন্ত্ৰীৰ এইদৰে সৰৱ হৈ পৰাটোৱে তেওঁ প্ৰকৃত দায়িত্ববোধ বুজি কাম কৰিছে নে কেৱল ৰাজনৈতিক আত্মপক্ষ ৰক্ষাৰ বাবে এনেদৰে সৰৱ হৈ পৰিছে, এইলৈ চিন্তাব্যক্ত কৰিছে বিশ্ববিদ্যালয় কৰ্তৃপক্ষই।
বিশ্ববিদ্যালয়ৰ কৰ্তৃপক্ষই হতাশা প্ৰকাশ কৰিছে যে ধাৰাবাহিক প্ৰতিবাদ, আবেদন আৰু প্ৰতিষ্ঠানিক মাজতো মুখ্যমন্ত্ৰীয়ে কেইবা সপ্তাহ ধৰি এই সংকটক আওকাণ কৰি আহিছিল। তেওঁলোকে মুখ্যমন্ত্ৰীক কয় যে শেষ মুহূৰ্তত মন্তব্য দিয়াৰ পৰিৱৰ্তে নেতৃত্বই সময়ত সঠিক সিদ্ধান্ত লোৱা উচিত। লগতে কয় যে, “আমাৰ দাবী অপৰিৱৰ্তিত হৈ আছে, তদন্ত চলি থকা অৱস্থাত বৰ্তমানৰ উপাচাৰ্যক তাৎক্ষণিকভাৱে নিলম্বন কৰাৰ লগতে, এজন কাৰ্যবাহী উপাচাৰ্য নিযুক্তি দিব লাগে; উপ-উপাচাৰ্য (Pro-VC) নহয় আৰু ইতিমধ্যে কৰ্তৃপক্ষক দাখিল কৰা সকলো তদন্তৰ প্ৰতিবেদন প্ৰকাশ কৰিব লাগে।