পশ্চিমবংগৰ লগতে বৰ্তমান ১২খন ৰাজ্যত এছআইআইৰ কাম চলি আছে। এই সময়ছোৱাৰ মাজতে কেন্দ্ৰীয় চৰকাৰে জনগণনাৰ বিষয়ে জানিবলৈ দিছে। মঙলবাৰে সংসদত আলোচনাৰ সময়ত কেন্দ্ৰীয় গৃহ ৰাজ্যমন্ত্ৰী নিত্যনিন্দ ৰায়ে এই বিষয়টো সদৰী কৰে।
নিত্যানন্দ ৰায়ে জনোৱা মতে জনগণনা দুটা পৰ্যায়ত অনুষ্ঠিত হ’ব।
প্ৰথম পৰ্যায় ২০২৬ চনৰ এপ্ৰিলৰ পৰা ছেপ্টেম্বৰ মাহলৈকে। এই পৰ্যায়ত ঘৰৰ তালিকা প্ৰস্তুত কৰা হ’ব আৰু ঘৰসমূহ গণনা কৰা হ’ব।
দ্বিতীয় পৰ্যায় ২০২৭ চনৰ ফেব্ৰুৱাৰী মাহত। এই পৰ্যায়ত নাগৰিকসকলৰ সংখ্যা গণনা কৰা হ’ব।
সময়সূচী আৰু বিশেষ অঞ্চল
কেন্দ্ৰীয় চৰকাৰে জনাইছে যে প্ৰথম পৰ্যায়ত ৰাজ্য আৰু কেন্দ্ৰীয় শাসিত অঞ্চলসমূহে নিজৰ সুবিধা অনুযায়ী একেৰাহে ৩০ দিনৰ সময় বাছি ল’ব পাৰিব।
অৱশ্যে, লাডাখ আৰু জম্মু-কাশ্মীৰৰ বৰফেৰে আবৃত অসমান অঞ্চলসমূহৰ লগতে হিমাচল প্ৰদেশ আৰু উত্তৰাখণ্ডৰ কিছু অংশত পৰিস্থিতিৰ বিবেচনা কৰি গণনাৰ কাম আগুৱাই অনা হ’ব। এই অঞ্চলসমূহত ২০২৬ চনৰ ছেপ্টেম্বৰ মাহতে গণনা সম্পূৰ্ণ কৰা হ’ব।
প্ৰশ্নকাকত আৰু জাতিভিত্তিক গণনা
গৃহ ৰাজ্যমন্ত্ৰীয়ে জনায় যে জনগণনাৰ প্ৰশ্নকাকত বিভিন্ন মন্ত্ৰালয়, বিভাগ, সংস্থাৰ পৰামৰ্শৰ ভিত্তিত চূড়ান্ত কৰা হব। কেবিনেটৰ পূৰ্বৰ সিদ্ধান্ত অনুসৰি এই জনসংখ্যা গণনাৰ সময়ত জাতিভিত্তিক গণনাও কৰা হ’ব।
সম্পূৰ্ণ ডিজিটেল পদ্ধতি
আন এক গুৰুত্বপূৰ্ণ সিদ্ধান্ত হৈছে যে ২০২৭ চনৰ জনগণনা সম্পূৰ্ণৰূপে ডিজিটেল পদ্ধতিৰে কৰা হ’ব।
তথ্য সংগ্ৰহ কৰা হ’ব ম’বাইল এপৰ জৰিয়তে। ইয়াৰ উপৰিও, স্বয়ংসম্পূৰ্ণ অনলাইন চেল্ফ-এনুমাৰেচন (Self-Enumeration) সুবিধাও থাকিব। ম’বাইল এপৰ মাধ্যমেৰে নাগৰিকসকলে নিজৰ নিজৰ পৰিসংখ্যা দাঙি ধৰিব পাৰিব।
কেতিয়া প্ৰকাশ হ’ব চূড়ান্ত তথ্য?
যদিও জনগণনাৰ কাম আৰম্ভ কৰাৰ কথা কোৱা হৈছে, কিন্তু ইয়াৰ চূড়ান্ত তথ্য কেতিয়া প্ৰকাশ কৰা হ’ব, সেয়া এতিয়াও স্পষ্ট হোৱা নাই। কিয়নো ২০২৯ চনত পুনৰ জনগণনা আছে। ইয়াৰ আগতে চূড়ান্ত তথ্য প্ৰকাশ কৰা হ’ব নে নহয়, সেই লৈ সন্দেহ আছে।
বৰ্তমান চলি থকা এছআইআৰৰ কাম ফেব্ৰুৱাৰী মাহত শেষ হ’ব। তাৰ পিছতেই পশ্চিমবংগ বিধানসভা নিৰ্বাচন আছে। এই ভোট শেষ হোৱাৰ পৰাই জনগণনাৰ কাম আৰম্ভ হ’বলৈ গৈ আছে। গতিকে, ২০২৬-২৭ চনটো যে এক বৃহৎ কৰ্মযজ্ঞৰ সাক্ষী হ’বলৈ গৈ আছে, সেয়া সহজেই অনুমান কৰিব পাৰি।