এটাৰ পিছত আনটো গুৰুত্বপূৰ্ণ বৈঠকত অনুপস্থিত থাকিল কংগ্ৰেছ সাংসদ শশী থাৰুৰ। এই ঘটনাই এতিয়া কংগ্ৰেছ দলৰ ভিতৰচৰাত তীব্ৰ গুঞ্জনৰ সৃষ্টি কৰিছে। সঁচাকৈয়ে দল ত্যাগ কৰিব নেকি তিৰুৱনন্তপুৰমৰ সাংসদগৰাকীয়ে? অৱশ্যে, সাংসদগৰাকীয়ে এই অভিযোগ অস্বীকাৰ কৰিছে।
বাতৰি অনুসৰি, দেওবাৰে সন্ধিয়া কংগ্ৰেছৰ শীৰ্ষ নেতৃত্বই এখন বৈঠকত মিলিত হয়। সংসদৰ শীতকালীন অধিৱেশনত দলৰ কৌশল কেনে হ’ব, সেই লৈ আলোচনা কৰিবলৈ সংসদীয় দলৰ চেয়াৰপাৰ্চন ছোনিয়া গান্ধীৰ বাসগৃহত এই বৈঠক অনুষ্ঠিত হৈছিল। বৈঠকত কংগ্ৰেছৰ সংসদীয় দলৰ মুৰব্বী মল্লিকার্জুন খৰ্গে আৰু জ্যেষ্ঠ নেতা ৰাহুল গান্ধীকে ধৰি অন্যান্য নেতাসকল উপস্থিত আছিল। কিন্তু তাৎপৰ্যপূৰ্ণভাৱে এই বৈঠকত অনুপস্থিত নাছিল শশী থাৰুৰ।
সংবাদ মাধ্যমক থাৰুৰে জনোৱা মতে, তেওঁ এই বৈঠকত উপস্থিত থাকিব নোৱাৰিব বুলি দলৰ হাইকমাণ্ডক পূৰ্বেই অৱগত কৰিছিল। অসুস্থ মাতৃৰ সৈতে বৰ্তমান তেওঁ কেৰালাত আছে। উল্লেখযোগ্য যে, এই লৈ ধাৰাবাহিকভাৱে দুখন গুৰুত্বপূৰ্ণ দলীয় বৈঠকত থাৰুৰ অনুপস্থিত থাকিল।
ইয়াৰ পূৰ্বে ১৮ নৱেম্বৰত চৰকাৰক শলঠেকত পেলোৱাৰ পৰিকল্পনা সন্দৰ্ভত গান্ধী আৰু খৰ্গেয়ে এখন বৈঠক আহ্বান কৰিছিল। শাৰীৰিক অসুস্থতাৰ দোহাই দি থাৰুৰে সেই বৈঠকতো অংশ লোৱা নাছিল।
কিন্তু বিতৰ্কৰ সূত্ৰপাত তেতিয়াই হয়, যেতিয়া বৈঠকৰ ঠিক আগদিনা সন্ধিয়া তেওঁক নৰেন্দ্ৰ মোদীৰ ভাষণত উপস্থিত থকা দেখা যায়। কেৱল উপস্থিত থকাই নহয়, ভাষণৰ পাছত মোদীক প্ৰশংসা কৰাৰ বাবে দলৰ ভিতৰতে তেওঁ ৰোষৰ সন্মুখীন হ’বলগীয়া হৈছিল।
শেহতীয়া কিছুদিন ধৰি বিভিন্ন সময়ত মোদীক প্ৰশংসা কৰি আহিছে থাৰুৰ। ভাৰত-পাক সংঘৰ্ষবিৰতিৰ পাছত যেতিয়া কংগ্ৰেছ নেতাসকলে চৰকাৰক সমালোচনা কৰিছিল, তেতিয়া থাৰুৰে দলৰ স্থিতিৰ বিপৰীতে গৈ মোদীক সমৰ্থন জনাইছিল। তেওঁ দাবী কৰিছিল যে “১৯৭১ আৰু ২০২৫ চন এক নহয়, দুয়োটা সময়ৰ মাজত পাৰ্থক্য আছে।” শেহতীয়াকৈ তেওঁ পুনৰ মোদীৰ প্ৰশংসাত পঞ্চমুখ হৈ পৰিছে, যাৰ ফলত তেওঁ দল এৰাৰ জল্পনা অধিক গা কৰি উঠিছে।
আগন্তুক বছৰৰ আৰম্ভণিতে কেৰালাত বিধানসভা নিৰ্বাচন অনুষ্ঠিত হ’ব। ৰাজনৈতিক মহলৰ ধাৰণা, যদি থাৰুৰে দল সলনি কৰিব বিচাৰে, তেন্তে নিৰ্বাচনৰ আগতেই তেওঁ সেই সিদ্ধান্ত ল’ব লাগিব। যদিও জ্যেষ্ঠ কংগ্ৰেছ নেতাসকল আৰু স্বয়ং থাৰুৰে দলত্যাগৰ সম্ভাৱনা নাকচ কৰিছে, তথাপিও উপৰ্যুপৰি বৈঠকত অনুপস্থিতি আৰু প্ৰধানমন্ত্ৰীৰ প্ৰতি থকা তেওঁৰ নৰম সুৰৰ বাবে এই জল্পনা এতিয়াই শাম কটাৰ কোনো লক্ষণ দেখা যোৱা নাই।