মহাৰাষ্ট্ৰত কৃষকৰ আত্মহত্যাৰ সংখ্যা উদ্বেগজনকভাৱে বৃদ্ধি পাইছে। চলিত বৰ্ষৰ প্ৰথম ন মাহত মুঠ ৭৮১ জন কৃষকে আত্মহত্যা কৰিছে। ঋণৰ বোজা, শস্যৰ বিকলতা আৰু অত্যধিক বৰষুণকে ধৰি বিভিন্ন কাৰণত ৰাজ্যৰ কৃষকসকলে নিজৰ জীৱন শেষ কৰিবলৈ বাধ্য হৈছে। এই তথ্য বৃহস্পতিবাৰে বিধান পৰিষদত ৰাজ্যৰ সাহায্য আৰু পুনৰ্বাসন মন্ত্ৰী মকাৰন্দ যাদৱ (পাটিল)য়ে এক লিখিত উত্তৰত সদৰি কৰে।
চৰকাৰী তথ্য অনুসৰি, বিদৰ্ভাৰ নাগপুৰ সংমণ্ডলত সৰ্বাধিক আত্মহত্যাৰ ঘটনা সংঘটিত হৈছে, য’ত চলিত বৰ্ষত ২৯৬ জন কৃষকে আত্মহত্যা কৰিছে। ইয়াৰ উপৰিও, মাৰাথৱাদাত ২১২ জন কৃষকৰ মৃত্যু হৈছে। এম এল চি সুধাকৰ আদৱালে, অশোক জগতাপ, অভিজিত ৱাঞ্জাৰী, ৰাজেশ ৰাথোৰ, ধীৰাজ লিংগাদে আদিয়ে বিধান পৰিষদত এই ক্ৰমাৎ বৃদ্ধি পোৱা আত্মহত্যাৰ পৰিস্থিতিক লৈ প্ৰশ্ন উত্থাপন কৰিছিল।
উত্তৰত মন্ত্ৰীগৰাকীয়ে কয় যে কৃষকৰ আত্মহত্যা ৰোধৰ বাবে জিলা পৰ্যায়ত কেইবাটাও পদক্ষেপ লোৱা হৈছে। এই পদক্ষেপসমূহৰ ভিতৰত আছে কৃষকৰ উৎপাদিত সামগ্ৰীৰ উচিত মূল্য নিশ্চিত কৰা, জলসিঞ্চনৰ সুবিধা বৃদ্ধি কৰা, শস্য বা কৃষিভূমি আৰু পশুধনৰ ক্ষতিৰ ক্ষিপ্ৰ ক্ষতিপূৰণ প্ৰদান কৰা, আৰু দুৰ্যোগ ব্যৱস্থাপনা কেন্দ্ৰসমূহ কাৰ্যক্ষম কৰি ৰখা।
ইয়াৰ পূৰ্বে জুলাই মাহত বিধান পৰিষদত আন এক প্ৰশ্নৰ উত্তৰত যাদৱে জনাইছিল যে চলিত বৰ্ষৰ জানুৱাৰীৰ পৰা মাৰ্চলৈকে মাত্ৰ তিনিমাহত মুঠ ৭৬৭টা কৃষকৰ আত্মহত্যাৰ ঘটনা পঞ্জীয়ন কৰা হৈছিল, ইয়াৰে ২৫০ জন আছিল কেৱল মাৰাথৱাদা আৰু বিদৰ্ভৰ।
২০২৩ চনৰ এনচিআৰবিৰ শেহতীয়া তথ্যৰ উদ্ধৃতি দি মন্ত্ৰীগৰাকীয়ে কয় যে দেশত কৃষকৰ আত্মহত্যাৰ আধা অংশ মহাৰাষ্ট্ৰত সংঘটিত হয়। বৰ্তমানলৈকে ৰাজ্যত ৬,৬৬৯ টা কৃষকৰ আত্মহত্যাৰ ঘটনা সংঘটিত হৈছে, য’ত ৪১৫০ জন কৃষক আৰু ২৫১৯ জন কৃষি শ্ৰমিক।
শেহতীয়া উত্তৰত যাদৱে লগতে কয় যে মুঠ ১০২টা আত্মহত্যাক চৰকাৰী ক্ষতিপূৰণৰ বাবে ‘যোগ্য’, ৬২টা ‘অযোগ্য’ আৰু ৮৬টা গোচৰৰ তদন্ত চলি আছে। ১০২টা যোগ্য পৰিয়ালৰ ভিতৰত ৭৭টা পৰিয়ালক ১ লাখ টকাকৈ আৰ্থিক সাহায্য প্ৰদান কৰা হৈছে, আনহাতে বাকী থকা গোচৰসমূহতো সাহায্য প্ৰদানৰ প্ৰক্ৰিয়া চলি আছে।
এই পৰিস্থিতিয়ে সংসদতো প্ৰতিক্ৰিয়াৰ সৃষ্টি কৰিছে। সেই সময়ত ৰাজ্যসভাত এন চি পি (এছ পি)ৰ সাংসদ ফৌজিয়া খানে মহাৰাষ্ট্ৰত যোৱা তিনিমাহত ৭৬৬টা কৃষকৰ আত্মহত্যাৰ অভিযোগ উত্থাপন কৰিছিল। তেওঁ চৰকাৰক “চৰকাৰে কেতিয়া কৃষকক ভাল পাব?” বুলি প্ৰশ্ন কৰিছিল। তেওঁ দাবী কৰিছিল যে বৰ্তমানৰ মুষলধাৰ বৰষুণ আৰু বানপানীৰ পাছত ৰাজ্য চৰকাৰে ৩১,৬২৮ কোটি টকাৰ সাহায্য পেকেজ ঘোষণা কৰিছিল যদিও বাস্তৱত কৃষকসকলে সেই সুবিধা লাভ কৰা নাই।